AQSHdagi radio dasturda Hindiston “do‘zax”ga qiyoslandi

Hindiston AQSH prezidenti Donald Tramp tomonidan ulashilgan va mamlakatni “do‘zaxga o‘xshash joy” (“hellhole”) deb ta’riflagan fikrlarni “asossiz” deb baholab, ularni noo‘rin va ikki davlat o‘rtasidagi mustahkam munosabatlarga mos kelmasligini bildirdi. Bu haqda Reuters xabar berdi.

 

Ma’lum qilinishicha, mazkur fikrlar konservativ sharhlovchi Maykl Savej tomonidan The Savage Nation radio dasturidagi chiqishida aytilgan. Tramp ushbu dastur stenogrammasini payshanba kuni o‘zining Truth Social sahifasida hech qanday, tushuntirishlarsiz joylashtirgan.

 

Stenogrammaga ko‘ra, Savej shunday degan: “Bu yerda tug‘ilgan bola darhol fuqaro bo‘ladi, keyin esa butun oilasini Xitoydan, Hindistondan yoki sayyoradagi boshqa ’do‘zaxga o‘xshash’ joylardan (Amerikaga) olib keladi.”

 

U, shuningdek, hozirgi muhojirlar orasida mamlakatga sadoqat deyarli yo‘qligini, bu avvalgidek emasligini aytgan. 

 

Tramp AQSHda tug‘ilganlik asosida fuqarolik berish amaliyotini cheklashga qaratilgan farmon chiqargan. Ushbu qaror AQSH Oliy sudida ko‘rib chiqilmoqda. U shu oy boshida mazkur masala bo‘yicha sud majlisida ham ishtirok etgan.

 

Hindiston Tashqi ishlar vazirligi payshanba kuni kechqurun ushbu bayonotlarga keskin munosabat bildirdi. Vazirlik vakili Randhir Jaysval bu izohlarni noo‘rin va saviyasiz deb atadi.

 

Uning ta’kidlashicha, bu fikrlar Hindiston va AQSH o‘rtasidagi o‘zaro hurmat va umumiy manfaatlarga asoslangan real munosabatlarni aks ettirmaydi.

 

AQShning Nyu Delidagi elchixonasi esa prezidentning Hindistonni “buyuk mamlakat” sifatida baholagan boshqa fikrlarini eslatib o‘tdi.

 

Hindistonning muxolif “Hindiston milliy kongressi” partiyasi mazkur bayonotni haqoratli deb baholab, bosh vazir Narendra Modini ushbu masalani AQSh rahbari bilan ko‘tarishga chaqirdi.

 

Ma’lumotlarga ko‘ra, AQShda qariyb 5,5 million hind kelib chiqishiga ega shaxslar istiqomat qiladi. Hind va xitoy diasporalari mamlakatdagi eng yirik Osiyo kelib chiqishidagi aholi guruhlarini tashkil etadi.

 

Tramp ma’muriyati tomonidan tug‘ilganlik asosida fuqarolik berishni cheklash tashabbusi ilgari surilgan bo‘lib, mazkur masala AQSH Oliy sudida ko‘rib chiqilmoqda.