Maduroni qo'lga olish operatsiyasida ishtirok etgan AQSH ofitseri hibsga olindi
U ushbu operatsiya bo‘yicha maxfiy ma’lumotlardan foydalangan holda 400 ming dollardan ortiq daromad olganlikda ayblanmoqda.
AQShda Venesuela prezidenti Nikolas Maduroni qo‘lga olish bo‘yicha maxsus operatsiyada qatnashgan harbiy xizmatchi hibsga olindi. U maxfiy hukumat ma’lumotlaridan foydalangan holda noqonuniy daromad orttirganlikda ayblanmoqda.
AQSh Adliya vazirligi ma’lumotiga ko‘ra, 38 yoshli serjant Gannon Ken Van Dayk 2025-yil dekabridan 2026-yil yanvarigacha Venesueladagi maxsus operatsiyani tayyorlash jarayonida ishtirok etgan. Shu bilan birga, u Polymarket platformasida operatsiya natijalari va siyosiy voqealar bo‘yicha pul tikish orqali foyda ko‘rgan.
Rasmiylarga ko‘ra, harbiy xizmatchi taxminan 13 ta tikish amalga oshirgan. Ular orasida AQSh harbiylarining Venesuelaga kirishi, Maduro hokimiyatdan chetlatilishi va qo‘lga olinishi bilan bog‘liq variantlar bo‘lgan. Natijada u 400 ming dollardan ortiq mablag‘ ishlab topgan.
Tergov ma’lumotlariga ko‘ra, Van Dayk daromadni keyinchalik kriptovalyutaga aylantirgan hamda akkauntini o‘chirib izlarni yashirishga uringan. Prokuratura buni davlat sirlaridan shaxsiy manfaat yo‘lida foydalanish sifatida baholamoqda.
Unga nisbatan maxfiy ma’lumotlardan noqonuniy foydalanish, firibgarlik va moliyaviy jinoyatlar bo‘yicha ayblov qo‘yilgan. Agar aybi isbotlansa, u 20 yilgacha ozodlikdan mahrum etilishi mumkin.
