O‘zbekistonda “Yangi avlod tadbirkorlari” dasturi ishga tushiriladi
Eng yaxshi natija ko‘rsatgan ming nafar ishtirokchiga sertifikat berilib, ularga imtiyozli kredit ajratiladi.
O‘zbekistonda yoshlarni tadbirkorlik faoliyatiga keng jalb etish, ularning bandligini ta’minlash va biznes ko‘nikmalarini oshirish maqsadida “Yangi avlod tadbirkorlari” dasturi ishga tushiriladi. Bu haqda Prezidentning “Yangi O‘zbekiston yoshlari – 2030” strategiyasini 2026–2027-yillarda amalga oshirish hamda yoshlar bandligini ta’minlash bo‘yicha qo‘shimcha chora-tadbirlar to‘g‘risida”gi qarorida belgilangan deb xabar beradi Adliya vazirligi.
Qarorga muvofiq, 2030-yilgacha Yoshlar ishlari agentligi tomonidan mazkur dastur amalga oshiriladi. U orqali 20 ming nafar yoshni tadbirkorlik faoliyatiga o‘qitish rejalashtirilgan.
Dastur doirasida mahalliy va xorijiy ekspertlar, shuningdek, xususiy sektor vakillari bilan hamkorlik yo‘lga qo‘yiladi. Ishtirokchilar tanlov asosida saralanadi hamda ularga biznes loyihani ishlab chiqish, mahsulotni bozorga olib chiqish, savdoni yo‘lga qo‘yish va bozorni kengaytirish bo‘yicha nazariy hamda amaliy bilimlar beriladi.
Loyiha yakunida yoshlarning bilim va ko‘nikmalari sinovdan o‘tkaziladi. Natijalarga ko‘ra, eng yaxshi ming nafar ishtirokchiga Yoshlar ishlari agentligining maxsus sertifikati topshiriladi.
Mazkur sertifikatga ega bo‘lgan yoshlarga asosiy stavkadan 50 foizga kamaytirilgan foiz stavkasida, 6 oylik imtiyozli muddat bilan 3 yilgacha 500 baravar BHM miqdorigacha kredit ajratiladi.
Shuningdek, 2026-yil 1-avgustdan boshlab tuman fermerlar kengashlari huzuridagi buxgalteriya hisobi markazlari yoshlar rahbarligidagi yangi fermer xo‘jaliklariga ikki yil davomida bepul xizmat ko‘rsatadi.
2026-yil 1-iyuldan esa yoshlar tomonidan tashkil etilgan tadbirkorlik subyektlarini elektr energiyasi, ichimlik suvi va kanalizatsiya tarmoqlariga ulash bilan bog‘liq davlat xizmatlari xarajatlarining bir qismi 10 baravar BHMdan oshmagan miqdorda qoplab beriladi.
