Soliq qo‘mitasi tadbirkorlarni soxta elektron xatlar haqida ogohlantirdi
Qo‘mita soliq organlarining barcha rasmiy xabarlari faqat soliq to‘lovchining shaxsiy kabineti orqali yuborilishini bildirdi.
Soliq qo‘mitasi tadbirkorlarga soxta elektron xatlar yuborilayotgani haqida rasmiy ogohlantirish bilan chiqdi.
Ma’lum qilinishicha, so‘nggi kunlarda Toshkent shahar soliq boshqarmasi hamda Yirik soliq to‘lovchilar bo‘yicha hududlararo soliq inspeksiyasi nomidan yuborilayotgan xatlar aniqlangan. Ushbu xabarlar norasmiy bo‘lib, firibgarlik maqsadida tarqatilmoqda.
Qayd etilishicha, mazkur elektron xatlar soliq tizimida ro‘yxatdan o‘tmagan. Ular tarkibidagi havolalar orqali qurilmalarga zararli dasturlar yuklanishi yoki foydalanuvchilarning shaxsiy ma’lumotlari qo‘lga kiritilishi mumkin.
Soliq qo‘mitasi soliq organlarining barcha rasmiy xabarlari faqat soliq to‘lovchining shaxsiy kabineti orqali yuborilishini eslatdi.
Fuqarolarga shubhali xabarlarda keltirilgan havolalarni bosmaslik, ilova qilingan fayllarni ochmaslik va ma’lumotlarni faqat rasmiy manbalar orqali tekshirishni tavsiya qilindi.
Shuningdek, fuqarolar shaxsiy ma’lumotlari xavfsizligini ta’minlash va firibgarlik holatlariga duch kelmaslik uchun hushyor bo‘lishga chaqirildi.
