AQSh va Eron muzokaralari 27-aprel kuni o‘tkazilishi mumkin
Muzokaralar oldidan Pokiston vositachiligida alohida maslahatlashuvlar o‘tkazilishi kutilmoqda.
AQSh va Eron o‘rtasidagi ehtimoliy to‘g‘ridan-to‘g‘ri muzokaralarning yangi bosqichi bo‘yicha dastlabki ma’lumotlar e’lon qilindi.
Axios nashri jurnalisti Barak Ravidning ma'lum qilishicha, ikki davlat vakillari o‘rtasidagi uchrashuv 27-aprel kuni Pokiston poytaxti Islomobod shahrida bo‘lib o‘tishi mumkin. Qayd etilishicha, muzokaralar Yaqin Sharqdagi vaziyatni yumshatish hamda mintaqaviy barqarorlik masalalariga bag‘ishlanishi kutilmoqda.
Ma’lumotlarga ko‘ra, ehtimoliy uchrashuv Eron tashqi ishlar vaziri Abbos Aroqchi hamda Amerika tomoni vakillari ishtirokida o‘tkazilishi rejalashtirilmoqda.
Shuningdek, muzokaralar oldidan AQSh prezidenti Donald Trampning kuyovi Jared Kushner hamda Prezidentning maxsus vakili Stiv Uitkoff ishtirokida Pokiston vositachiligida alohida maslahatlashuvlar bo‘lib o‘tishi mumkinligi bildirilgan.
Avvalroq Eron tomoni Vashington bilan muzokaralarda yon bermasligini ma’lum qilgani, shuningdek ayrim takliflar rad etilgani haqida ham xabarlar tarqalgan edi.
