Livan bilan tinchlik jarayoni boshlangan — Netanyaxu
Isroil bosh vaziri Donald Tramp Eronga har tomonlama kuchli bosim o‘tkazayotganini bildirdi.
Isroil bosh vaziri Binyamin Netanyaxu Isroil Donald Tramp ma’muriyati bilan Eron ustidan iqtisodiy va harbiy bosimni kuchaytirayotganini ma’lum qildi. Bu haqda Iran International xabar berdi.
U juma kuni e’lon qilingan video murojaatida Isroil “Yaqin Sharqdagi vaziyatni o‘zgartirishga intilayotganini” va hozirgi siyosiy hamda harbiy choralar shu strategiya doirasida amalga oshirilayotganini bildirdi.
Netanyaxu Eron masalasida AQSh bilan hamkorlik davom etayotganini ta’kidlab, Tramp bilan o‘tgan suhbat “juda yaxshi” bo‘lganini qayd etdi. Uning so‘zlariga ko‘ra, AQSh Eronga nisbatan iqtisodiy va harbiy bosimni kuchaytirmoqda va Isroil ham bu jarayonda to‘liq hamkorlikda harakat qilmoqda.
Shuningdek, u Isroilning shimoliy yo‘nalishdagi vaziyatiga to‘xtalib, Livan bilan diplomatik munosabatlar boshlanganini bildirdi.
Uning aytishicha, tomonlar o‘rtasida “tarixiy tinchlik”ka erishish jarayoni boshlangan, biroq bu jarayonni izdan chiqarishga urinishlar mavjud.
“Livan bo‘yicha biz Isroil va Livan o‘rtasida tarixiy tinchlikka erishish jarayonini boshladik, ammo ‘Hizbulloh’ uni buzishga urinmoqda,” — dedi Netanyaxu.
Ma’lumot o‘rnida, 23-aprel kuni kechqurun AQSH prezidenti Donald Tramp Isroil va Livan o‘rtasidagi sulh yana uch haftaga uzaytirilganini va Vashington ikki davlat o‘rtasida uzoq muddatli tinchlik kelishuviga erishishga intilayotganini e’lon qildi.
