Saida Mirziyoyeva prezident topshirig‘i bilan Samarqandga bordi
Prezident administratsiyasi rahbari Toyloq va Urgut tumanlarida bo‘ldi, yangilangan “Navoiy” poliklinikasi faoliyati bilan tanishdi.
Prezident topshirig‘iga muvofiq Prezident administratsiyasi rahbari Saida Mirziyoyeva Samarqand viloyatiga tashrif buyurdi.
Tashrif doirasida Toyloq tumanida mahallalarni toza ichimlik suvi bilan to‘liq ta’minlash maqsadida suv tarmoqlarini rekonstruksiya qilish va yangilash ishlari ko‘zdan kechirildi.
Shuningdek, Urgut tumanida ham bo‘lib, yangi turar joylar, tibbiyot muassasalari, maktab va maktabgacha ta’lim tashkilotlari qurilishi, mavjud obyektlarni modernizatsiya qilish va kengaytirish jarayonlari bilan tanishildi.
Tashrif davomida Mirziyoyeva fermerlar oilasi — Haydarovlar xonadonida ham bo‘lib, ularning tajribasi bilan tanishdi. Ularning tajribasini ommalashtirish mumkinligi ta’kidlandi.
Bundan tashqari, Prezident topshirig‘i asosida tubdan rekonstruksiya qilingan “Navoiy” oilaviy poliklinikasi faoliyati ham o‘rganildi. Ushbu muassasada 16 ta qishloq ayollariga xizmat ko‘rsatuvchi zamonaviy tug‘ruq bo‘limi tashkil etilgan.
Ma’lum qilinishicha, yaqinda mazkur poliklinikada birinchi chaqaloq — Shavkatjon dunyoga kelgan. Saida Mirziyoyeva buni amalga oshirilayotgan ishlarning xayrli ekaniga ishora sifatida baholadi.
