So‘nggi o‘n yillikda ocharchilik qurbonlari soni 9 baravar ko‘paydi — BMT
2025-yilda dunyoning 47 mamlakat va hududida 266 million kishi o‘tkir oziq-ovqat tanqisligiga duch kelgan.
Birlashgan Millatlar Tashkiloti agentliklari tomonidan tayyorlangan 2026-yilgi Oziq-ovqat inqirozi bo‘yicha global hisobotda dunyoda ocharchilik darajasi keskin yomonlashayotgani qayd etildi.
Hisobotga ko‘ra, 2016-yildan buyon halokatli darajadagi ochlikka duch kelayotgan insonlar soni to‘qqiz baravar oshgan. Shu bilan birga, o‘tkir oziq-ovqat tanqisligi holatlari ham so‘nggi o‘n yillikda ikki baravar ko‘paygan.
2025-yilda hisobot tarixida ilk bor bir vaqtning o‘zida ikki hududda — G‘azo sektori hamda Sudanning ayrim qismlarida halokatli ocharchilik darajasi rasman e’lon qilingan.
BMTning Integratsiyalashgan oziq-ovqat xavfsizligi tasnifi tizimiga muvofiq, mazkur hududlardagi vaziyat eng yuqori — beshinchi bosqich sifatida baholangan. Ushbu daraja aholining ommaviy gumanitar yordamga muhtojligini anglatadi.
Hisobotda qayd etilishicha, Afg‘oniston, Bangladesh, Kongo Demokratik Respublikasi, Myanma, Nigeriya, Pokiston, Janubiy Sudan, Sudan, Suriya va Yaman davlatlari o‘tkir ocharchilik xavfi yuqori bo‘lgan asosiy hududlar sirasiga kiradi. Mazkur mamlakatlarda dunyodagi ochlikdan aziyat chekayotgan aholining qariyb uchdan ikki qismi yashaydi.
2025-yilda 47 ta mamlakat va hududda jami 266 million kishi yuqori darajadagi oziq-ovqat xavfsizligi muammosiga duch kelgan. Bu tahlil qilingan umumiy aholining qariyb 23 foizini tashkil etadi.
Shuningdek, bolalar o‘rtasidagi to‘yib ovqatlanmaslik muammosi ham jiddiy tus olgan. Hisobotga ko‘ra, 2025-yilda 35,5 million bola o‘tkir to‘yib ovqatlanmaslikdan aziyat chekkan bo‘lsa, shundan qariyb 10 million nafari og‘ir holatda bo‘lgan.
