Surxondaryoda ichki a’zosiga giyohvand modda yashirgan xorijlik ushlandi
U to‘g‘ri ichagiga 3 ta polietilen o‘ramida opiy joylagan.
Termiz xalqaro savdo markazida 27 yoshli qo‘shni davlat fuqarosi ichki a’zolariga shubhali predmetlarni yashirgani aniqlandi. Bu haqda Bojxona qo‘mitasi xabar berdi.
Ma’lum qilinishicha, ushbu shaxs o‘zining to‘g‘ri ichak qismiga 3 dona polietilen o‘ramlarni joylagan. U 36 yoshli boshqa bir fuqaroga o‘ramlarni topshirayotgan vaqtida qo‘lga olindi.
O‘ramlar belgilangan tartibda va xolislar ishtirokida ochib ko‘rilganida esa uning ichidagi modda 203 gr. og‘irlikdagi “opiy” giyohvandlik moddasi ekanligi aniqlandi.
Shu kunning o‘zida tezkor tadbir Termiz shahrida davom ettirilib, mazkur giyohvandlik vositalarini qabul qilib olishi kerak bo‘lgan oxirgi shaxs 40 yoshli fuqaro ham qo‘lga olindi.
Hozirda mazkur holat yuzasidan bojxona organlari tomonidan tergovga qadar tekshiruv harakatlari olib borilmoqda.
