Turkiyada 15 yoshgacha bo‘lgan bolalarning ijtimoiy tarmoqlarga kirishi cheklanadi
Endilikda o‘yin platformalari ham yosh mezonlari asosida tartibga solinadi.
Turkiyada 15 yoshgacha bo‘lgan bolalarning ijtimoiy tarmoqlardan foydalanishini cheklashga qaratilgan yangi qonun qabul qilindi. Mazkur hujjatga ko‘ra, raqamli platformalar voyaga yetmagan foydalanuvchilarning yoshini tekshirish bo‘yicha maxsus tizimlarni joriy etishi shart bo‘ladi.
Yangi tartib ijtimoiy tarmoqlar bilan bir qatorda o‘yin platformalariga ham tatbiq etiladi. Endilikda bunday xizmatlar o‘yinlarni yosh toifalari asosida tasniflab, tegishli nazorat mexanizmlarini yo‘lga qo‘yishi lozim.
Shuningdek, foydalanuvchilari soni yuqori bo‘lgan xalqaro platformalarga Turkiya hududida rasmiy vakil tayinlash talabi ham belgilandi. Bu esa davlat organlari bilan hamkorlikni kuchaytirish va qonunchilik talablariga rioya etilishini ta’minlashga qaratilgan.
Mahalliy OAV xabarlariga ko‘ra, rasmiylar bolalar xavfsizligini oshirish maqsadida nomaqbul kontentni avtomatik bloklaydigan maxsus bolalar SIM-kartalarini joriy etish masalasini ham ko‘rib chiqmoqda. Bundan tashqari, VPN xizmatlarini cheklash hamda 18 yoshgacha bo‘lganlar uchun internetdan foydalanish bo‘yicha qo‘shimcha tartiblarni joriy etish ehtimoli ham muhokama qilinmoqda.
Eslatib o'tamiz, 15-aprel kuni Turkiyaning janubi-sharqidagi Qahramanmarash viloyatidagi maktabda yuz bergan otishmada to'qqiz kishi halok bo'lgan va 21 kishi jarohatlangan edi. 14-aprel kuni Shanliurfa viloyatidagi maktabda o'n to'qqiz kishi jarohat olgani xabar qilingan edi.
