Qamchibek Tashiev davlat to‘ntarishiga urinish sabab ishdan bo‘shatilgan — deputat
Tashiyev joriy yil fevral oyida maxsus xizmat rahbari lavozimidan ozod etilgandi.
Qirg‘iziston parlamenti deputati Elvira Surabaldiyeva mamlakat Milliy xavfsizlik davlat qo‘mitasining sobiq raisi Qamchibek Tashiyev lavozimidan davlat to‘ntarishiga urinish bilan bog‘liq holatlar sabab ozod etilganini ma’lum qildi.
Deputatning ta’kidlashicha, mazkur voqealar yuzasidan tergov harakatlari davom etmoqda. Uning aytishicha, ayrim shaxslar allaqachon hibsga olingan yoki tergov jarayoniga jalb etilgan.
Surabaldiyeva prezident Sadir Japarov tomonidan qattiqroq chora ko‘rilmaganini davlat rahbarining saxovatpeshaligi sifatida baholagan. U prezident uchun ushbu vaziyat siyosiy va shaxsiy jihatdan murakkab sinov bo‘layotganini ham qayd etgan.
Eslatib o‘tamiz, Qamchibek Tashiyev joriy yil fevral oyida Milliy xavfsizlik davlat qo‘mitasi raisi lavozimidan ozod etilgandi.
Keyinchalik Qirg‘iziston prezidenti uning davlat xizmatiga qaytmasligini bildirgan.
Ayni paytda rasmiy organlar mazkur bayonotlar yuzasidan qo‘shimcha izoh bermagan.
