Tramp Kushner va Uitkoffning Pokistonga safarini bekor qildi

AQSh prezidenti Donald Tramp maxsus vakil Stiv Uitkoff hamda kuyovi Jared Kushnerning Pokistonga rejalashtirilgan safarini bekor qilganini ma’lum qildi. Mazkur tashrif Eron bilan ehtimoliy tinchlik muzokaralari doirasida tashkil etilishi rejalashtirilgan edi.

 

Trampning Fox News telekanaliga bergan intervyusida aytishicha, vakillarning Islomobodga safari bekor qilingan. U bunga safarga ketadigan vaqtning ko‘pligi, ichki ishlar jadvalining bandligi hamda Eron rahbariyatidagi ichki kelishmovchiliklarni sabab sifatida ko‘rsatgan.

 

AQSh prezidenti keyinchalik mazkur qaror Eron bilan qarama-qarshilik qayta boshlanishini anglatmasligini ta’kidlagan. Uning so‘zlariga ko‘ra, hozircha bu borada yakuniy qarorlar ko‘rib chiqilmagan.

Shuningdek, Tramp Truth Social platformasidagi bayonotida Eron bo‘yicha rejalashtirilgan barcha Amerika delegatsiyalari safarlari bekor qilinganini tasdiqlagan. U Tehron rahbariyati ichidagi kelishmovchiliklar muzokara jarayoniga to‘sqinlik qilayotganini qayd etgan.

 

Mazkur bayonotlar Eron tashqi ishlar vaziri Abbos Aroqchi Pokistonga tashrif buyurib, rasmiylar bilan ikki tomonlama masalalarni muhokama qilganidan so‘ng yangragan. OAV xabarlariga ko‘ra, Eron delegatsiyasi keyinchalik Islomobodni tark etgan.

 

Ayni paytda tomonlar o‘rtasida avval e’lon qilingan sulh rejimi saqlanib qolmoqda. Shu bilan birga, AQShning Eron portlariga nisbatan blokadasi hamda Eronning Hormuz bo‘g‘ozi bo‘yicha cheklovlari bekor qilinmagan.