Viktor Orban Vengriya parlamentini tark etdi
U parlament faoliyatidan ko‘ra milliy harakatlarni tiklash muhimligini ta’kidladi.
Vengriya bosh vaziri Viktor Orban parlament saylovlarida hukmron koalitsiya mag‘lubiyatga uchraganidan so‘ng parlamentdagi deputatlik mandatidan voz kechganini ma’lum qildi. Bu haqda DW nashri xabar berdi.
Siyosatchi 25-aprel kuni ijtimoiy tarmoqlardagi sahifalarida e’lon qilgan bayonotida, Fidesz–Xristian-demokratik xalq partiyasi koalitsiyasi yetakchi nomzodi sifatida olgan mandati amalda partiyaga tegishli ekanini bildirib, undan voz kechishga qaror qilganini qayd etgan.
Orban o‘z bayonotida ayni paytda parlament faoliyatidan ko‘ra, milliy harakatni qayta tashkil etish muhimroq ekanini ta’kidlagan.
Shuningdek, uning ma’lum qilishicha, avval Bosh vazir devoniga rahbarlik qilgan Gergeli Gulyash endilikda parlamentdagi Fidesz/KDNP fraksiyasiga rahbarlik qiladi.
Viktor Orban Fidesz partiyasi raisi sifatida faoliyatini davom ettirishga tayyorligini bildirgan. Mazkur masala iyun oyida bo‘lib o‘tadigan partiya qurultoyida ko‘rib chiqiladi.
Vengriyada bo‘lib o‘tgan parlament saylovlarida g‘alaba qozongan Tisza partiyasi yetakchisi Peter Magyar 9-may kuni bosh vazir lavozimini egallashi kutilmoqda.
