Ostonada OHIChKning iqlim va barqaror rivojlanish bo‘yicha yig‘ilishi o‘tkazildi
O‘zbekiston 2030-yilga borib yashil energiya ulushini 54 foizga yetkazishni rejalashtirmoqda.
Qozog‘iston poytaxti Ostona shahrida o‘tkazilayotgan Mintaqaviy ekologik sammit doirasida Osiyoda hamkorlik va ishonch choralari bo‘yicha kengash (OHIChK)ning “Global iqlim o‘zgarishi va OHIChK mintaqasida barqaror rivojlanish” mavzusidagi yig‘ilishi bo‘lib o‘tdi.
Tadbirda a’zo davlatlar hukumatlari, xalqaro tashkilotlar va ekspert doiralar vakillari ishtirok etdi. Uchrashuvdan ko‘zlangan asosiy maqsad iqlim o‘zgarishi sharoitida mintaqaviy muloqotni mustahkamlash, hamkorlikni kengaytirishdan iborat bo‘ldi.
Yig‘ilish davomida iqlim o‘zgarishi, suv resurslarini samarali boshqarish, ekologik ifloslanishga qarshi kurashish, cho‘llanishning oldini olish hamda bioxilma-xillikni saqlash kabi asosiy ekologik masalalar muhokama qilindi. Shuningdek, ekologik yo‘nalishda tajriba almashish va qo‘shma tashabbuslarni ilgari surish zarurligi qayd etildi.
O‘zbekiston nomidan Ekologiya va iqlim o‘zgarishi milliy qo‘mitasi huzuridagi Iqlim o‘zgarishi milliy markazi direktori Farrux Sattarov so‘zga chiqdi. U iqlim o‘zgarishi mamlakat iqtisodiyoti, qishloq xo‘jaligi va ijtimoiy sohalarga bevosita ta’sir ko‘rsatayotganini ta’kidladi.
MMBH 3.0'dagi ma’lumotlariga ko‘ra, O‘zbekiston harorat oshishi va yerlarning degradatsiyasi kabi iqlimiy xatarlar kuchayishiga duch kelmoqda.
Javob chorasi sifatida mamlakat o‘z majburiyatlarini kuchaytirdi, jumladan, 2035-yilga borib 2010-yil darajasiga nisbatan YAIMning uglerod sig‘imini 50 foizga kamaytirish maqsadi qo‘yilgan. Buning uchun katta miqdordagi resurslar — chiqindilarni kamaytirish uchun taxminan 33,7 mlrd dollar va moslashish uchun 15,7 mlrd dollar talab etiladi.
Asosiy ustuvor yo‘nalishlar sifatida qayta tiklanuvchi energiyani rivojlantirish, tabiiy ekotizimlarni tiklash, suvdan oqilona foydalanish hamda iqlim siyosatini iqtisodiy rivojlanish strategiyalariga integratsiya qilish belgilandi. Xususan, 2030-yilga borib mamlakat energiya balansida “yashil” energiya ulushini 54 foizga yetkazish rejalashtirilgan.
Shuningdek, Parij kelishuvi maqsadlariga erishish uchun jahon miqyosidagi sa’y-harakatlar hozircha yetarli emasligi, bu esa COP29 natijalarida ham tasdiqlangani qayd etildi. Shu munosabat bilan, jumladan, OHIChK doirasida mintaqaviy hamkorlikni yanada kuchaytirish muhimligi ta’kidlandi.
Yig‘ilish yakunida O‘zbekiston mintaqada iqlim bo‘yicha amaliy hamkorlikni kengaytirish va qo‘shma tashabbuslarni qo‘llab-quvvatlashga tayyor ekanini yana bir bor tasdiqladi.
