Toshkentda 40 ta soxta YTH orqali sug‘urta pullarini o‘zlashtirgan guruh ushlandi

Toshkent shahrida sahnalashtirilgan yo‘l-transport hodisalari orqali sug‘urta tovonlarini noqonuniy qo‘lga kiritib kelgan uyushgan guruh faoliyati fosh etildi. Bu haqda Rost24 xabar berdi.

 

Ma’lum qilinishicha, “BLACK BULL RENT” MChJ rahbari A.A. boshchiligidagi guruh 2024-yil davomida amalda sodir bo‘lmagan YTHlarni tizimli ravishda uyushtirib kelgan. Guruh a’zolari o‘zaro vazifalarni taqsimlab, ayrimlari avtomobil topish, boshqalari haydovchi yoki jabrlanuvchi rolini bajarish, yana bir qismi esa hujjatlarni qalbakilashtirish bilan shug‘ullangan.

 

Tergov jarayonida ular jami 40 ta soxta YTH holatini rasmiylashtirgani aniqlangan. Har bir epizodda deyarli bir xil sxema qo‘llangan, bir xil avtomobillar bir necha bor turli rollarda ishlatilgan. Ayrim holatlarda bitta transport vositasi bir safar aybdor, keyingi safar esa jabrlanuvchi sifatida ko‘rsatilgan.

 

Firibgarlik sxemasida asosan Malibu-2, Tracker, Nexia va VAZ rusumidagi avtomobillardan foydalanilgan. Qalbakilashtirilgan hujjatlarda zarar miqdori deyarli bir xil — 13–14 million so‘m atrofida ko‘rsatilgan va aynan shu summalar sug‘urta tovonlari sifatida undirilgan.

 

Aniqlanishicha, mazkur sxema orqali oltita sug‘urta kompaniyasiga zarar yetkazilgan. Umumiy moddiy zarar 811,8 million so‘mni tashkil etgan.

 

Mazkur holat yuzasidan jinoyat ishlari bo‘yicha sud hukmi chiqarilib, A. Abdusattorov, S. Abdusattorov va Z. Yo‘ldoshev Jinoyat kodeksining 168-moddasi (firibgarlik) hamda 228-moddasi (hujjatlarni qalbakilashtirish) bilan aybdor deb topildi.

 

Ayblanuvchilar bilan tuzilgan iqrorlik kelishuvi inobatga olinib, ularning har biriga 103 million 700 ming so‘m miqdorida jarima jazosi tayinlandi.