Vladimir Putin Eron TIV rahbari Abbos Aroqchi bilan uchrashuv o‘tkazdi
Uchrashuvda Rossiya prezidentiga Eron oliy rahbari nomidan maxsus murojaat yetkazilgan.
Rossiya prezidenti Vladimir Putin Sankt-Peterburg shahrida Eron tashqi ishlar vaziri Abbos Aroqchini qabul qildi. Uchrashuv davomida Eron oliy rahbari nomidan maxsus murojaat yetkazilgani ma’lum qilindi.
Kreml matbuot xizmati xabariga ko‘ra, tomonlar Rossiya va Eron o‘rtasidagi ikki tomonlama hamkorlik, mintaqadagi vaziyat hamda Yaqin Sharqdagi keskinlikni yumshatish masalalarini muhokama qilgan.
Vladimir Putin uchrashuvda Eron xalqiga tinchlik va barqarorlik tilaklarini bildirib, Rossiya mintaqada vaziyatni diplomatik yo‘l bilan hal etish tarafdori ekanini ta’kidladi.
Abbos Aroqchi esa Tehron nomidan Moskvaning doimiy qo‘llab-quvvatloviga minnatdorlik bildirib, Rossiya va Eron o‘rtasidagi aloqalar strategik sheriklik ruhida rivojlanayotganini qayd etdi.
Tomonlar mintaqaviy xavfsizlik, siyosiy muloqotni davom ettirish hamda keskinlikni kamaytirishga qaratilgan sa’y-harakatlarni muvofiqlashtirish masalalariga alohida e’tibor qaratdi.
Mazkur uchrashuv Eron va AQSh o‘rtasida kutilayotgan navbatdagi muzokaralar arafasida bo‘lib o‘tgani sababli xalqaro ekspertlar e’tiborini tortmoqda.
