Boysunda daryoga neftning oqib ketgani tabiatga 8,5 milliard so‘mdan ortiq zarar yetkazdi
23-aprel kuni kuchli yog‘ingarchiliklar oqibatida taxminan 1,2 tonna neft mahsulotlari aralash suyuqlik Xongaronsoyga oqib ketgan.
Surxondaryo viloyatining Boysun tumanida neft aralash suyuqlikning daryoga oqib ketishi bilan bog‘liq holat yuzasidan 8,5 milliard so‘mdan ortiq zarar hisoblandi. Bu haqda Ekologiya va iqlim o‘zgarishi milliy qo‘mitasi huzuridagi Davlat ekologik nazorat inspeksiyasi ma’lum qildi.
Ma’lum qilinishicha, o‘rganishlar davomida “Surxan Gas Chemical Operating Company” MChJ qo‘shma korxonasiga qarashli quduqlardan birida neft mahsulotlari aralash suyuqlikning qaynab chiqish holati aniqlangan. Mazkur suyuqlikning tabiiy suv havzalariga tushishining oldini olish maqsadida korxona tomonidan “Eriell Oilfield Services Middle East DMCC” kompaniyasining maxsus texnikalari jalb etilib, 11 ta handaq qazilgan.
Biroq 23-aprel kuni hududda kuzatilgan kuchli yog‘ingarchiliklar oqibatida taxminan 1,2 tonna neft mahsulotlari aralash suyuqlik Xongaronsoyga oqib ketgani aniqlangan.
Holat yuzasidan O‘zbekiston Respublikasi Vazirlar Mahkamasining 2021-yil 12-apreldagi 202-son qaroriga muvofiq kompensatsiya to‘lovlari hisoblab chiqilgan bo‘lib, zarar miqdori 8,5 milliard so‘mdan ortiqni tashkil etgan.
Hozirda yuzaga kelgan holat bartaraf etilgani, suv havzasi neft aralash suyuqlikdan tozalangani bildirilmoqda.
Shuningdek, o‘rganish ishlari davom etmoqda. Jarayon yakunlangach, to‘plangan materiallar holatga huquqiy baho berish uchun huquqni muhofaza qiluvchi organlarga taqdim etiladi.
