Namanganda bank bosh yuriskonsulti pora bilan ushlandi
U kredit to‘lay olmagan klinika mulklarining auksionga qo‘yilishini cho‘zib, masalani ijobiy hal qilib bermoqchi bo‘lgan.
Namangan viloyatidagi banklardan birining bosh yuriskonsulti pora bilan qo‘lga olindi. Bu haqda DXX xabar berdi.
Ma’lum qilinishicha, u Namangan shahridagi xususiy tibbiy klinikalardan biri mazkur bankdan 2021-yilda olgan 16,2 mlrd so‘m kredit mablag‘larini o‘z vaqtida to‘lay olmaganligi sababli, garov ta’minoti sifatida qo‘yilgan mulklarning auksion savdolariga chiqarilishini 5-6 oyga cho‘zib turish va keyinchalik ularni klinikaga qaytarib berish masalasini ijobiy hal etish evaziga 3 ming AQSH dollari talab qilgan.
Davlat xavfsizlik xizmati va Iqtisodiy jinoyatlarga qarshi kurashish departamenti xodimlari hamkorligida o‘tkazilgan tezkor tadbirda bosh yuriskonsult klinika rahbaridan so‘ralgan pul mablag‘ini olgan vaqtida ashyoviy dalillar bilan ushlandi.
Unga nisbatan jinoyat ishi qo‘zg‘atilib, tergov harakatlari olib borilmoqda.
