Bag‘dod tumaniga yangi hokim tayinlandi
U avval Farg‘ona viloyati hokimining qurilish masalalari bo‘yicha o‘rinbosari sifatida ham ishlagan.
Bag‘dod tumaniga Isaqov Hojiqo‘zijon hokim etib tayinlandi. Bu haqda Farg‘onal viloyati hokimligi xabar berdi.
Ma’lum qilinishicha, Xalq deputatlari Bag‘dod tuman Kengashining navbatdan tashqari sessiyasida lavozimidan ozod etilgan G‘anijon Soliyev o‘rniga yangi tuman hokimini tayinlash bilan bog‘liq tashkiliy masala ko‘rildi. Sessiya ishida viloyat hokimi Xayrullo Bozorov ishtirok etdi.
Viloyat hokimi Xayrullo Bozorov tomonidan taqdim etilgan Isaqov Hojiqo‘zijon Qosimjonovich nomzodi tuman deputatlari tomonidan qo‘llab-quvvatlanib, Bag‘dod tumani hokimi etib tasdiqlandi.
U hozirga qadar Farg‘ona viloyati 426-xo‘jaliklararo ixtisoslashgan ko‘chma mexanizmlar kolonnasi mas’uliyati cheklangan jamiyati boshlig‘i bo‘lib ishlab kelgan.
Hojiqo‘zijon Isaqov avval Farg‘ona viloyati hokimining qurilish masalalari bo‘yicha o‘rinbosari sifatida ham ishlagan.
