Chexiya Bosh vaziri Andrey Babish rasmiy tashrif bilan O‘zbekistonga keladi
Toshkentda oliy darajadagi muzokaralar o‘tkazilishi rejalashtirilgan.
Chexiya Bosh vaziri Andrey Babish 29-30-aprel kunlari rasmiy tashrif bilan Oʻzbekistonga keladi, deb xabar berdi Oʻzbekiston Prezidenti matbuot xizmati .
Tashrif dasturiga muvofiq, Toshkentda oliy darajadagi muzokaralar bo'lib o'tadi, ular davomida O'zbekiston-Chexiya ko'p qirrali hamkorligini yanada rivojlantirish istiqbollari muhokama qilinadi.
Asosiy e'tibor o'zaro savdoni oshirish va mashinasozlik, yashil energiya, kimyo, farmatsevtika va transport sohalaridagi hamkorlikni chuqurlashtirishga qaratiladi. Madaniy, gumanitar va ta'lim sohalaridagi hamkorlik masalalari ham muhokama qilinadi.
Xalqaro masalalar, jumladan, koʻp tomonlama maydonlarda oʻzaro qoʻllab-quvvatlash boʻyicha fikr almashinuv ham boʻlib oʻtadi.
Uchrashuv yakunida ikki tomonlama hujjatlar to'plami imzolanishi kutilmoqda.
Bosh vazir Andrey Babish tashrifi doirasida Oʻzbekiston-Chexiya biznes forumida ham ishtirok etadi.
