Qamchibek Tashiyev davlat to‘ntarishiga urinishda ayblandi
Tashiyev bilan yana 2 nafar sobiq amaldor mazkur ish yuzasidan so‘roq qilindi.
Qirg‘izistonda davlat to‘ntarishiga urinish bilan bog‘liq jinoyat ishi doirasida bir qator sobiq yuqori lavozimdagi shaxslar so‘roq qilindi. Bu haqda advokat Sherdor Abdiqaparovga tayanib, 24.kg xabar berdi.
Advokatning bildirishicha, Davlat milliy xavfsizlik qo‘mitasining (GKNB) sobiq raisi Qamchibek Tashiyev, sobiq deputat Kurmankul Zulushev hamda Jogorku Keneshning sobiq raisi Nurlanbek Shakiyev Ichki ishlar vazirligiga chaqirilib, so‘roq qilingan.
Ma’lum qilinishicha, ularga nisbatan ushbu ish bo‘yicha avval boshqa gumondorlarga qo‘llanilgan ayblovlar doirasida protsessual harakatlar amalga oshirilgan. Ayblovlar ommaviy tartibsizliklarni tashkil etish hamda tergov tomonidan davlat to‘ntarishiga urinish sifatida baholanayotgan harakatlar bilan bog‘liq.
Huquqni muhofaza qiluvchi organlardagi manbalarga ko‘ra, so‘roqlar IIVning Bosh tergov boshqarmasida bir necha soat davom etgan va shundan so‘ng sobiq amaldorlar idora binosini tark etgan.
Rasmiy idoralar hozircha ayblovlar mazmuni va tergov jarayoniga oid batafsil ma’lumotlarni oshkor etmagan. Biroq manbalarga ko‘ra, tergov “75 maktubi” deb ataluvchi murojaat bilan bog‘liq.
Avval xabar berilganidek, fevral oyida 75 nafar shaxs Sadir Japarov hamda Jogorku Kenesh rahbariyatiga murojaat yo‘llab, muddatidan oldin prezident saylovlarini o‘tkazishni taklif qilgan edi.
Ushbu voqealardan keyin Kamchibek Tashiyev GKNB raisi va Vazirlar kabineti raisining o‘rinbosari lavozimlaridan ozod etilib, GKNBda qayta tashkil etish ishlari amalga oshirildi.
Xususan, bir qator yuqori lavozimdagi amaldorlar ishdan olindi. Nurlanbek Shakiyev raislikdan ketib, deputatlik mandatini topshirdi. Kurmankul Zulushev ham deputatlik vakolatlaridan voz kechdi. Keyinchalik mazkur holat yuzasidan jinoyat ishi qo‘zg‘atildi.
Qayd etilishicha, “75 maktubi”ni imzolaganlarning bir qismi tergov hibsxonasiga joylashtirilgan bo‘lib, ularga ommaviy tartibsizliklarni tashkil etish aybi qo‘yilgan.
Avvalroq Qirg‘iziston Prezidenti Sadir Japarov Kamchibek Tashiyev ushbu murojaat mualliflari bilan uchrashganini rad etganini bildirgan. Shu bilan birga, u Tashiyev kelgusida davlat lavozimlariga tayinlanmasligini ta’kidlagan.
Uning ukasi Shoirbek Tashiyev ham deputatlik mandatini topshirib, korrupsiya ishi bo‘yicha so‘roq qilingan.
