Telegram’da “APK” dasturlarni sotib yurgan yigit ushlandi
Ushbu dasturlar orqali o‘zgalarning xabarlarini o‘qish, to‘lov tizimlaridagi mablag‘larni o‘zlashtirish imkoniyati mavjud bo‘lgan.
Toshkent viloyatida Telegram orqali zararli dasturlar sotib kelgan shaxs faoliyatiga chek qo‘yildi. Bu haqda Zamon.uz’ga DXX xabar qildi.
Ma’lum qilinishicha, Chirchiq shahrida yashovchi, 2005-yilda tug‘ilgan fuqaro o‘zi yaratgan zararli “APK” dasturlarini 100–300 ming so‘m oralig‘idagi narxlarda “Telegram” orqali kamida 10 nafar foydalanuvchiga sotgan.
Tergov ma’lumotlariga ko‘ra, u xaridorlarga texnik ko‘mak ham ko‘rsatib, dasturlardan foydalanish jarayonida yuzaga kelgan muammolar bo‘yicha maslahatlar berib kelgan.
Qayd etilishicha, ushbu zararli dasturlar orqali boshqalarning Telegram akkauntlariga ruxsatsiz kirish, telefonlardagi SMS xabarlarni o‘qish va to‘lov tizimlaridagi mablag‘larni o‘zlashtirish imkoniyati mavjud bo‘lgan.
Shuningdek, gumonlanuvchi Telegram'dagi 5 dan ortiq guruh va kanallarga administratorlik qilib, ularda muntazam ravishda mazkur dasturlarning imkoniyatlari haqida post joylab borgan.
Tezkor tadbir davomida undan Asus ExpertBook rusumli noutbuk, Redmi Note 10 Pro telefoni, qattiq disk hamda bank plastik kartalari ashyoviy dalil sifatida olib qo‘yildi.
Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
