Buxoro va Surxondaryoda qariyb 13 kg opiy aylanmasi to‘xtatildi
Giyohvandlik moddasi Afg‘onistondan kontrabanda yo‘li bilan olib kirilgan.
Davlat xavfsizlik xizmati hamda bojxona idoralari hamkorligida o‘tkazilgan tezkor tadbirlarda giyohvandlik vositalarining yirik partiyasi noqonuniy aylanmadan chiqarildi. Bu haqda Zamon.uz'ga DXX xabar berdi.
Ma’lum qilinishicha, Buxoro shahrida yashovchi, 1993-yilda tug‘ilgan va muqaddam narkojinoyat uchun sudlangan shaxs boshqaruvidagi Chevrolet Lacetti avtomashinasi “Surxondaryo–Buxoro” yo‘nalishida harakatlanayotgan vaqtida Kogon tumanida to‘xtatilgan.
Avtomashina ko‘zdan kechirilganda, motor qismidagi havo filtri ostiga yashirilgan 993 gramm “opiy” moddasi aniqlanib, protsessual tartibda rasmiylashtirib olingan.
Surishtiruvlar davomida gumonlanuvchi ushbu narkotik moddani Termiz tumanida yashovchi, 1980-yilda tug‘ilgan va xalqaro yuk tashish bilan shug‘ullanuvchi shaxsdan olgani ma’lum bo‘lgan. Tezkor tadbirlar davom ettirilib, mazkur shaxs ham ushlangan.
Uning yonidan 5 kilogramm, yashash manzilidan esa yana 7 kilogramm “opiy” giyohvandlik vositasi ashyoviy dalil sifatida olib qo‘yilgan. Tergov ma’lumotlariga ko‘ra, ushbu moddalar avval Afg‘onistondan kontrabanda yo‘li bilan olib kirilgan bo‘lishi mumkin.
Hozirda holat yuzasidan jinoyat ishi qo‘zg‘atilib, tergov harakatlari olib borilmoqda.
