Putin va Tramp o‘rtasida 1,5 soatlik telefon suhbati bo‘lib o‘tdi

Rossiya prezidenti Vladimir Putin va AQSH prezidenti Donald Tramp o‘rtasida oldindan e’lon qilinmagan telefon muloqoti bo‘lib o‘tdi. Bu haqda Agentstvo yozmoqda.

 

Ma’lum qilinishicha, suhbat davomida Ukrainada 9-may munosabati bilan o‘t ochishni to‘xtatish masalasi muhokama qilingan.

 

Kreml va Oq uy manbalariga ko‘ra, muloqot tashabbusi Rossiya tomonidan bildirilgan. Putin yordamchisi Yuri Ushakov asosiy e’tibor Eron va Fors ko‘rfazi atrofidagi vaziyatga qaratilganini aytdi. Tramp esa suhbatda asosan Ukraina masalasi ko‘tarilganini bildirgan.

 

AQSH prezidenti muloqotni “juda yaxshi” deb baholab, Rossiya rahbariga qisqa muddatli o‘t ochishni to‘xtatish taklifini bildirganini aytdi. Kreml versiyasiga ko‘ra esa, Putin 9-may — G‘alaba kuni munosabati bilan Ukraina bilan vaqtinchalik sulh e’lon qilishga tayyor ekanini ma’lum qilgan va Tramp bu tashabbusni qo‘llab-quvvatlagan.

 

Nashr xabariga ko‘ra, muloqotdan so‘ng Tramp matbuot anjumanida Ukraina “harbiy jihatdan mag‘lubiyatga uchragani” haqida bayonot berdi. Uning aytishicha, mamlakatning harbiy infratuzilmasi jiddiy zarar ko‘rgan. Biroq keyinchalik bu raqamlar aslida Eronga taalluqli ekani haqida qarashlar bildirildi.

 

Kreml ma’lumotiga ko‘ra, Putin suhbat davomida Rossiya armiyasining Ukrainadagi harakatlari haqida ham axborot bergan. 

 

“RIA Novosti” ham suhbatning boshqa tafsilotlarini e’lon qildi

 

Qayd etilishicha, muloqot davomida Putin Trampga nisbatan sodir etilgan suiqasd urinishini qat’iy qoralab, unga qo‘llab-quvvatlov bildirgan. Shuningdek, u AQSH rahbarining Eronga nisbatan o‘t ochishni to‘xtatish rejimini uzaytirish qarorini to‘g‘ri deb baholagan.

 

Tomonlar Eron yadroviy dasturi atrofidagi kelishmovchiliklarni ham muhokama qilgan. Putin mazkur masala bo‘yicha bir qator yechim variantlarini taklif etgan. Moskva AQSH tomonidan Eronga qarshi quruqlikda harbiy operatsiya o‘tkazish ehtimolini xavfli deb hisoblashini bildirgan.

 

Kreml Rossiya Eron, Fors ko‘rfazi davlatlari, Isroil va AQSH bilan faol muloqotlarni davom ettirishini bildirgan.

 

Suhbat chog‘ida Putin Melaniya Trampni tug‘ilgan kuni bilan tabriklab, uning Rossiya va Ukraina oilalarini bolalari bilan qayta birlashtirishga qaratilgan faoliyatini e’tirof etgan.

 

Bundan tashqari, yetakchilar iqtisodiyot va energetika sohalarida o‘zaro manfaatli loyihalar istiqbolini muhokama qilgan.