Toshkent aeroportida qushlardan himoya qiluvchi yangi intellektual tizim joriy etildi
Tizim sun’iy intellekt yordamida qushlarni avtomatik aniqlab, ularni haydash uchun yo‘naltirilgan ovozli va ultratovush signallardan foydalanadi.
Toshkent aeroportida qushlardan himoya qiluvchi “AVES Airport” joriy etildi. Bu haqda Uzbekistan Airports xabar berdi.
Ma’lum qilinishicha, Germaniyada ishlab chiqilgan mazkur tizim parvozlar xavfsizligini ta’minlashning ornitologik sohasidagi eng zamonaviy yechimlardan biri hisoblanadi.
Tizim sun’iy intellekt yordamida yuqori xavfli hududlardagi qushlarni avtomatik ravishda aniqlash, kuzatish va haydash funksiyalarini bajaradi. Va inson omilini sezilarli darajada pasaytiradi.
Tizim to‘liq avtonom tarzda ishlab havo kemalarining harakatiga qarab mustaqil ravishda faollashadi va o‘chadi.
Kameralar qushlarni kunduzi 1000 metrgacha, tunda esa 400 metrgacha bo‘lgan masofada aniqlashga qodir hamda murakkab ob-havo sharoitlarida ham o‘z vaqtida chora ko‘rishni ta’minlaydi.
Qushlarni haydash uchun yo‘naltirilgan ovozli va ultratovush signallardan foydalaniladi. Qushlar ushbu ta’sirga o‘rganib qolmasligi uchun signallar doimiy ravishda o‘zgarib turadi. Shu bilan birga, tizim masofa va atrof-muhitga qarab ovoz balandligini tartibga soladi va ekotizimga salbiy ta’sirni kamaytiradi.
Bundan tashqari bir nechta qurilmalar hamkorlikda ishlab, qushlarni xavfsiz zonalarga yo‘naltiradi. Mutaxassislar uchun tahlil va boshqaruv oson bo‘lishi uchun tizim doimiy ravishda ma’lumotlarni yig‘ib boradi.
Shuningdek, tizim bir vaqtning o‘zida 256 tagacha qushni aniqlash, kuzatish va haydash imkoniga ega.
