Toshkent metrosi yer usti halqa liniyasida ish vaqti o‘zgartiriladi
Metro poyezdlari endilikda bir soat oldindan harakatlana boshlaydi.
Toshkent metropoliteni matbuot xizmati xabariga ko‘ra, 2026-yil 1-maydan boshlab yer usti halqa liniyasida poyezdlar harakati jadvali o‘zgartiriladi.
Yangi tartibga muvofiq, mazkur yo‘nalishda metro poyezdlari endilikda har kuni soat 05:00 dan 23:00 gacha yo‘lovchilarga xizmat ko‘rsatadi. Avval ushbu liniyada harakat soat 06:00 dan 23:00 gacha amalga oshirilgan edi.
Jadvaldagi o‘zgarish poyezdlar harakatini bir soat oldin boshlash orqali yo‘lovchilarga qo‘shimcha qulaylik yaratish va xizmat ko‘rsatish sifatini oshirish maqsadida joriy etilmoqda.
Shu bilan birga, Toshkent metropolitenining boshqa (Chilonzor, O‘zbekiston va Yunusobod) yo‘nalishlarida poyezdlar harakati avvalgidek har kuni soat 05:00 dan 00:00 gacha davom etadi.
