AQShdan deportatsiya qilingan 26 nafar o‘zbekistonlik Vatanga qaytarildi
Reys ikki davlat idoralari hamkorligida tashkil etildi.
Bugun, 1-may kuni Toshkent shahridagi xalqaro aeroportga AQSh migratsiya qonunchiligini buzganlikda ayblanib deportatsiya qilingan 26 nafar O‘zbekiston fuqarosi olib kelingan charter reys qo‘ndi. Bu haqda Dunyo axborot agentligi xabar berdi.
Ma’lum qilinishicha, mazkur reys O‘zbekiston va AQShning tegishli idoralari o‘rtasidagi hamkorlik asosida tashkil etilgan. Jarayonda fuqarolarning shaxsini aniqlash, hujjatlarini rasmiylashtirish hamda ularni xavfsiz tarzda Vatanga qaytarish bo‘yicha barcha zarur tashkiliy va huquqiy tartib-taomillar muvofiqlashtirilgan holda amalga oshirilgan.
Rasmiy ma’lumotlarga ko‘ra, O‘zbekiston migratsiya sohasida xorijiy hamkorlar bilan o‘zaro aloqalarni izchil rivojlantirib, noqonuniy migratsiyaning oldini olish hamda chet eldagi fuqarolarining huquq va qonuniy manfaatlarini himoya qilishga alohida e’tibor qaratmoqda.
