Eron 2026-yilgi Jahon chempionatida ishtirok etadi — FIFA
U xalqaro futbol siyosiy keskinliklardan ustun turishi kerakligini ta’kidladi.
FIFA prezidenti Janni Infantino 2026-yil AQSh, Kanada va Meksikada o‘tkaziladigan Jahon chempionatida Eron terma jamoasi ishtiroki borasidagi barcha shubhalarga nuqta qo‘ydi, deya xabar bermoqda The Guardian.
Ma'lum qilinishicha, Infantino FIFA kongressi davomida qilgan chiqishida Eron musobaqada ishtirok etishini va o‘z o‘yinlarini AQSh hududida o‘tkazishini qat’iy tarzda tasdiqladi. Uning ta’kidlashicha, xalqaro futbol siyosiy keskinliklardan ustun turishi kerak.
“Eron albatta Jahon chempionatida ishtirok etadi va AQShda o‘ynaydi. Bizning vazifamiz — futbol orqali odamlarni birlashtirish,” dedi FIFA prezidenti.
Shu bilan birga, Eron futbol federatsiyasi delegatsiyasining Kanada kongressidagi ishtiroki bilan bog‘liq tashkiliy muammolar qayd etildi. Ayrim vakillarning kirish ruxsatnomalari bekor qilingani yoki rad etilgani haqida ma’lumotlar tarqaldi. Kanada tomoni xavfsizlik yuzasidan va ayrim shaxslarning Eron inqilobi qo‘riqchilari korpusi bilan bog‘liqlik ehtimoli sabab tekshiruv o‘tkazgan.
Eron terma jamoasi guruh bosqichida Yangi Zelandiya, Belgiya va Misrga qarshi maydonga tushishi rejalashtirilgan. Agar Eron va AQSh o‘z guruhlarida ikkinchi o‘rinni egallasa, ular pley-off bosqichida o‘zaro to‘qnash kelishi mumkin.
AQSh rasmiylari esa ayrim federatsiya vakillari xavfsizlik tekshiruvlari sababli kirishda qiyinchilikka duch kelishi ehtimolini inkor etmadi. Xususan, ayrim shaxslarning xavfsizlikka oid aloqalari bo‘yicha qo‘shimcha tekshiruvlar o‘tkazilishi mumkinligi bildirilgan.
Infantino shuningdek FIFA chiptalar savdosidagi rekord ko‘rsatkichlar, turnirga bo‘lgan yuqori talab hamda tashkilot daromadlarining sezilarli o‘sishi haqida ham ma’lumot berdi. Uning so‘zlariga ko‘ra, 2026-yilgi Jahon chempionatiga bo‘lgan talab avvalgi turnirlarga nisbatan bir necha barobar yuqori.
Kongress yakunida FIFA rahbari amaldagi vakolat muddati tugagach, tashkilot prezidenti lavozimiga yana nomzodini qo‘yishini rasman ma’lum qildi.
