Husanov aprel oyida “Siti”ning eng yaxshi futbolchisi bo‘lmadi
Muxlislar ovoz berish natijalariga ko‘ra, ushbu sovrin jamoa himoyachisi Niko O‘Rayliga nasib etdi.
“Manchester Siti” klubi aprel oyi yakunlariga ko‘ra eng yaxshi futbolchini e’lon qildi. Muxlislar ovoz berish natijalariga ko‘ra, ushbu sovrin jamoa himoyachisi Niko O‘Rayliga nasib etdi.
Klub akademiyasi tarbiyalanuvchisi bo‘lgan 21 yoshli futbolchi ushbu nominatsiya uchun kurashda o‘zbekistonlik Abduqodir Husanov va portugaliyalik Bernardo Silvani ortda qoldirdi. Bu — O‘Raylining so‘nggi uch oy ichida ikkinchi bor oyning eng yaxshi o‘yinchisi deb topilishi bo‘ldi. U avval ham fevral oyida ushbu e’tirofga sazovor bo‘lgan edi.
Klub xabarida ta’kidlanishicha, futbolchi aprel oyida namoyon etgan yuqori texnik mahorat, energiya va taktik moslashuvchanlik jamoa bosh murabbiyi Pep Guardiola qo‘l ostidagi jamoaning muvaffaqiyatiga salmoqli hissa qo‘shgan. Jamoa ushbu davrda Angliya Premer-ligasi va mamlakat kubogi doirasidagi barcha beshta uchrashuvda g‘alaba qozongan.
Shuningdek, O‘Rayli gol urishda ham o‘zini ko‘rsatdi. U “Chelsi”ga qarshi safar uchrashuvida (3:0) hisobni ochgan gol muallifi bo‘ldi.
Ma’lumot uchun, Abduqodir Husanov bundan avval 2025-yil fevral, 2026-yil yanvar va mart oylarida “Manchester Siti”da oyning eng yaxshi futbolchisi deb topilgan edi.
