Prezident o‘zbekistonlik askarni o‘z uyida yashirgan britaniyalik er-xotinni “Do‘stlik” ordeni bilan mukofotladi
Le Bretonlar urush yillarida fashistlar konslageridan qochib chiqqan o‘zbekistonlik askarning hayotini saqlab qolgan.
Shavkat Mirziyoyev tomonidan imzolangan farmonga muvofiq, Buyuk Britaniya fuqarolari – marhum Jon va Fillis Emili Le Bretonlar O‘zbekiston Respublikasining “Do‘stlik” ordeni bilan mukofotlandi.
Mazkur yuksak mukofot ularga Ikkinchi jahon urushi davrida namoyon etilgan jasorat va insonparvarlik uchun berildi. Qayd etilishicha, ular o‘ta murakkab va xavfli sharoitda Jersi orolidagi fashistlar konslageridan qochib chiqqan o‘zbekistonlik askar Boqijon Akramovni o‘z uylarida yashirish orqali uning hayotini saqlab qolgan.
Ularning ushbu fidokorona harakati insoniylik, mehr-oqibat va jasoratning yorqin namunasi sifatida e’tirof etildi. Shuningdek, mazkur qahramonlik dunyo xalqlari o‘rtasida tinchlik, do‘stlik va birodarlik g‘oyalarini mustahkamlashga xizmat qilgani alohida ta’kidlandi.
