Sirdaryoda norasmiy nikohdagi ayol erining qonuniy xotini va qizini pichoqlab o‘ldirdi
Halok bo‘lgan ayolning 4 nafar farzandi bo‘lgan. 3 yoshli qizi ham pichoqlanib, og‘ir ahvolda shifoxonaga yotqizilgan.
Sirdaryo viloyatining Shirin shahrida sodir bo‘lgan og‘ir jinoyat oqibatida ayol va uning 5 yoshli qizi halok bo‘ldi, yana bir 3 yoshli qizaloq esa og‘ir ahvolda shifoxonaga yotqizildi. Bu haqda Kun.uz xabar berdi.
Ma’lumotlarga ko‘ra, voqea 29-aprel kuni kechga yaqin yuz bergan. 1997-yilda tug‘ilgan ayol o‘z uyida uy yumushlari bilan band bo‘lgan vaqtida turmush o‘rtog‘ining shar’iy nikohdagi ayoli — 29 yoshli N.X. xonadonga kirib kelib, unga va ikki nafar farzandiga pichoq bilan hujum qilgan. Shundan so‘ng gumonlanuvchi voqea joyidan yashiringan.
Hujum oqibatida ayol va uning 5 yoshli qizi voqea joyida vafot etgan. 3 yoshli qizaloq esa og‘ir ahvolda shifoxonaga olib ketilgan bo‘lib, hozirda jonlantirish bo‘limida qolmoqda.
Marhumaning yaqinlari bildirishicha, ayol Toshkent viloyatining Bekobod shahridan Sirdaryoga kelin bo‘lgan.
“U ayol bir necha bor kuyovimga borib xotiningni o‘ldiraman deb aytgan ekan. Kuyovim qo‘lingdan kelmaydi, degan. Mana, nima bo‘ldi, qizim va nevaramdan ayrildim. Qizimning 4 farzandi bor edi. 8 yoshli o‘g‘li va 20 kunlik chaqalog‘i qoldi.
Shifoxonadagi nevaram ham og‘ir ahvolda. Tegishli tashkilotlardan iltimos qilaman, ularni bizning qaramog‘imizga olib berishsin”, degan ayolning otasi.
“O‘sha kuni opam uyida kir yuvib o‘tirgan bo‘lgan. U ayol borib, pichoq bilan tashlangan. Baqir-chaqirni eshitib, uydan ikki qizi yugurib chiqqan. Ularga ham pichoq urgan”, degan marhumaning jiyani.
Bosh prokuror matbuot kotibi Hayot Shamsutdinovning nashrga bildrishicha, holat yuzasidan Sirdaryo viloyati o‘ta og‘ir jinoyatlarni tergov qilish bo‘limi tomonidan Jinoyat kodeksining 97-moddasi (qasddan oam o‘ldirish) 2-qismi “a,v,j” bandlari bilan jinoyat ishi qo‘zg‘atilgan.
Gumonlanuvchi N.X. protsessual tartibda ushlangan.
