Sirdaryoda shar’iy erining xotini va bolasini o‘ldirgan ayol qamoqqa olindi
Ayol qasddan odam o‘ldirishda ayblanib, tergov hibsxonasiga joylashtirildi.
Sirdaryo viloyatining Shirin shahrida ayol norasmiy nikohdagi erining xotinini va 2 nafar qizini pichoqlagani, oqibatda ayol va 5 yoshli qizi vafot etgani xabar qilingandi.
Mazkur vaziyat yuzasidan Oliy sud axborot xizmati rasmiy axborot berdi.
Ma’lum qilinishicha, jinoyat ishlari bo‘yicha Shirin tuman sudida Shirin shahar prokurorining Jinoyat kodeksining 97-moddasi (qasddan odam o‘ldirish) 2-qismi “a”, “v”, “j” bandlarida nazarda tutilgan jinoyatni sodir etganlikda ayblanuvchi N. X. (ayol, 1997-yilda Sirdaryo viloyatida tug‘ilgan) ga nisbatan “qamoqqa olish” tarzidagi ehtiyot chorasini qo‘llash to‘g‘risidagi iltimosnomasi taqdim etilgan hujjatlar bilan ko‘rib chiqildi.
Sudning 2026-yil 30-apreldagi ajrimi bilan iltimosnoma qanoatlantirilib, ayblanuvchi N. X. qamoqqa olinishi va tergov hibsxonasiga joylashtirilishi belgilandi.
