Tehron xalqaro aeroportida reyslar tiklanmoqda
Hozirda 8 ta mahalliy aviakompaniya 15 ta yo‘nalish bo‘yicha parvozlarni amalga oshirmoqda.
Tehrondagi Imom Xomeyniy nomidagi xalqaro aeroportda tijorat reyslari qariyb ikki oylik tanaffusdan so‘ng bosqichma-bosqich qayta tiklanmoqda. Bu haqda Al Jazeera xabar berdi.
Ma’lum qilinishicha, AQSh–Isroil harbiy harakatlari ortidan 58 kun davomida reyslar amalga oshirilmagan.
Eron rasmiylari 25-apreldan boshlab havo qatnovi asta-sekin yo‘lga qo‘yilganini bildirdi. Hozirda 8 ta mahalliy aviakompaniya 15 ta yo‘nalish bo‘yicha parvozlarni amalga oshirmoqda. Ular orasida Istanbul, Maskat, Madina, shuningdek Xitoy va Rossiya yo‘nalishlari mavjud. Shunga qaramay, reyslar soni urushdan oldingi darajaga yetgani yo‘q.
Urushdan avval aeroport kuniga o‘rtacha 150 ta reysga xizmat ko‘rsatgan bo‘lsa, hozirda terminal hududlarida faollik endigina tiklanmoqda.
Imom Xomeyniy aeroport shaharchasi rahbari Ramin Kashef Azar xorijiy aviakompaniyalar qaytishi siyosiy vaziyat va xavfsizlik bahosiga bog‘liqligini ta’kidladi.
Eron fuqaro aviatsiyasi ma’lumotlariga ko‘ra, urush oqibatida 20 ta samolyot yo‘q qilingan, biroq aeroport infratuzilmasi deyarli to‘liq — 95 foiz saqlanib qolgan.
Eron havo hududi 19-apreldan boshlab to‘rt bosqichda ochildi: dastlab tranzit reyslar, keyin ichki qatnovlar, so‘ng xalqaro parvozlar tiklana boshladi. Biroq Tehron va Vashington o‘rtasidagi siyosiy keskinlik xorijiy aviakompaniyalar faoliyatiga hali ham ta’sir ko‘rsatmoqda.
Aeroportlar va aviatsiya sektori zarar ko‘rdi
Harbiy harakatlar davomida Eronning fuqaro aviatsiyasi tizimi jiddiy zarar ko‘rdi. Rasmiy ma’lumotlarga ko‘ra, 3,3 mingdan ortiq kishi halok bo‘lgan, minglab odamlar jarohatlangan.
Tehrondagi Mehrobod aeroporti ham bir necha bor zarbaga uchragan. Asosan ichki reyslarga xizmat qiluvchi ushbu aeroport 2009-yilgacha mamlakatning asosiy havo darvozasi bo‘lgan. Shuningdek, Koshon, Tabriz, Ahvoz, Mashhad, Xoy va Urmiya aeroportlari ham hujumlar nishoniga aylangan, natijada bir qator fuqarolik samolyotlari shikastlangan.
Biznes va turizmga zarba
Parvozlarning to‘xtatilishi iqtisodiyotga ham salbiy ta’sir ko‘rsatdi. Turizm va xizmat ko‘rsatish sohalarida faoliyat keskin qisqardi, ko‘plab ish o‘rinlari yo‘qotildi. Turizm sohasida ishlovchi mutaxassislar daromadlar pasaygani va ommaviy qisqartirishlar yuz berganini aytmoqda.
Xususan, Navro‘z bayrami davrida — odatda eng gavjum mavsumda — reyslarning bekor qilinishi tur paketlari, charter qatnovlar va mehmonxona bronlariga jiddiy zarba berdi. Ayrim kompaniyalar mijozlarga mablag‘ qaytarish bilan shug‘ullanishga majbur bo‘lib, xodimlar sonini keskin kamaytirgan.
Ehtiyotkor tiklanish
Mutaxassislar fikricha, reyslarning qayta tiklanishi Eronning global transport tizimiga qaytishidan darak beradi. Biroq siyosiy noaniqlik va xavfsizlik omillari sabab aviatsiya sektori hali to‘liq tiklanganicha yo‘q.
Shu tariqa, aeroportlar yana faoliyatga qaytmoqda, yo‘lovchilar oqimi ortmoqda. Ammo vaziyatning barqarorlashuvi ko‘p jihatdan mintaqadagi siyosiy jarayonlarga bog‘liq bo‘lib qolmoqda.
