AQSh G‘azodagi insonparvarlik missiyasini yopadi

 

Qo‘shma Shtatlar Isroilda joylashgan Fuqarolik-harbiy muvofiqlashtirish markazi (CMCC) faoliyatini to‘xtatish to‘g‘risida qaror qabul qildi. Mazkur markaz Isroil va HAMAS o‘rtasidagi sulhni monitoring qilish hamda G‘azoga gumanitar yordam yetkazishni muvofiqlashtirish bilan shug‘ullangan.

 

Bu haqda Reuters axborot agentligi manbalarga tayanib xabar bermoqda.

 

Ma’lumotlarga ko‘ra, qaror AQSh prezidenti Donald Trampning Yaqin Sharq bo‘yicha tinchlik tashabbusi doirasidagi jarayonlar murakkablashgani fonida qabul qilingan. Sulh kelishuviga qaramay Isroil tomonidan harbiy harakatlarning davom etishi hamda HAMAS tomonidan qurolsizlanish bo‘yicha kelishuvlarning bajarilmagani vaziyatni murakkablashtirgani qayd etilgan.

 

Rejaga muvofiq, CMCC funksiyalari AQSh boshchiligidagi Xalqaro barqarorlashtirish guruhi tarkibiga o‘tkaziladi. Shu bilan birga, amerikalik harbiy xizmatchilar soni 190 nafardan 40 nafargacha qisqartiriladi, ularning o‘rnini esa boshqa davlatlardan kelgan fuqarolik mutaxassislari egallashi rejalashtirilmoqda. Markazning nomi Xalqaro G‘azoni qo‘llab-quvvatlash markazi sifatida o‘zgartirilishi ehtimoli ham qayd etilgan.

 

Diplomatik manbalar qayta tashkil etish jarayoni mavjud vaziyatga sezilarli o‘zgarish kiritishi borasida shubha bildirmoqda.

 

Shuningdek, G‘azoda sulh kuchga kirganidan beri G'azoda 800 dan ortiq falastinliklar va to'rt nafar Isroil askari halok bo'lgan, 2 million aholi esa ommaviy ravishda ko‘chishga majbur bo‘layotgani ta’kidlangan.

 

Avvalroq The Guardian nashri manbalarga tayanib , Donald Tramp ma'muriyati G'azo sektorining janubida taxminan 140 gektar maydonni egallagan harbiy baza qurishni rejalashtirayotgani va bu baza Xalqaro barqarorlashtirish kuchlari (ISF) uchun operatsiyalar markazi bo'lib xizmat qilishini xabar qilgan edi.