Chirchiqda yuk vagoni ustiga chiqqan ikki nafar o‘quvchini tok urdi
Bolalar og‘ir kuyish jarohatlari bilan shifoxonaga yotqizilgan.
Toshkent viloyatining Chirchiq shahrida yuk vagoni ustiga chiqqan ikki nafar voyaga yetmagan maktab o'quvchisi tok urishi oqibatida og‘ir tan jarohati oldi. Bu haqda “Millar” dasturida xabar berildi.
Ma’lum qilinishicha, 27-aprel kuni Chirchiq temir yo‘l bekatining Nurhayot—Qodiriya yo‘nalishida to‘xtab turgan yuk vagonlari ustiga chiqqan 2011 va 2014-yillarda tug‘ilgan o‘quvchilar yuqori kuchlanishli elektr toki ta’siriga tushgan.
Hodisadan so‘ng jabrlanuvchilar zudlik bilan tez tibbiy yordam orqali Toshkent shahridagi 16-sonli Respublika shoshilinch tibbiy yordam ilmiy markaziga olib borilib, jonlantirish bo‘limiga yotqizilgan.
Tibbiy xulosaga ko‘ra, ularga tana yuzasining 25–30 foizini qamrab olgan ikkinchi va uchinchi darajali kuyish jarohatlari tashxisi qo‘yilgan. Hozirda bemorlarning ahvoli o‘rta og‘ir deb baholanmoqda va zarur muolajalar davom ettirilmoqda.
Mazkur holat yuzasidan Toshkent mintaqasi temiryo‘l transportida xavfsizlikni ta’minlash boshqarmasi tomonidan tergovga qadar tekshiruv ishlari olib borilmoqda.
Avval ham Chirchiq shahrida 17 yoshli o‘smirni poyezd vagoni ustida tok urib, og‘ir ahvolda shifoxonaga yotqizilgani haqida xabar berilgandi. Hodisada yigit tanasining qariyb 80–85 foizi kuygan.
