Eron AQSH bilan muzokara o‘tkazishga tayyor — WSJ

Eron AQSH bilan ziddiyatni diplomatik yo‘l bilan hal etish bo‘yicha yangi tashabbus bilan chiqdi. Tehron vositachilar orqali Vashington uning so‘nggi taklifini muhokama qilishga rozi bo‘lsa, kelasi hafta boshida Pokistonda muzokaralarda ishtirok etishga tayyorligini bildirgan. Bu haqda The Wall Street Journal’ga tayanib Apa.az xabar berdi.

 

Nashr ma’lumotlariga ko‘ra, Eron avvalgi taklifida AQSH hujumlarni to‘xtatib, Eron portlariga qo‘yilgan blokadani bekor qilsa, Hormuz bo‘g‘ozini ochish shartlarini muhokama qilishga tayyorligini bildirgan. Shuningdek, Tehron AQSH sanksiyalarini yumshatish evaziga o‘z yadro dasturiga oid masalalarni ham muzokara qilishni taklif qilgan.

 

The Guardian nashrining yozishicha, Eron payshanba kuni kechqurun yangi taklifni Pokiston orqali Vashingtonga yetkazgan, biroq uning mazmuni hozircha oshkor etilmagan. AQSH prezidenti Donald Tramp ushbu taklifdan “qoniqmaganini” bildirib, muzokaralar kutilgan natijani bermayotganini ta’kidladi.

 

“Hozir muzokaralar ketyapti, lekin ular natija bermayapti. Tanlov — yo ularni butunlay yo‘q qilish, yo kelishuvga erishish”, dedi u jurnalistlarga.

 

Uning so‘zlariga ko‘ra, Eron tomoni “rozi bo‘lish mumkin bo‘lmagan talablar”ni ilgari surmoqda.

 

Vashingtonda esa Tramp urush vakolatlari to‘g‘risidagi qonunda belgilangan muddatni rad etib, Eron bilan erishilgan sulh amalda 60 kunlik hisobni “to‘xtatib qo‘yganini” iddao qildi. Bu talqin ko‘plab huquqshunoslar tomonidan bahsli deb baholanmoqda.

 

So‘nggi kunlarda Pokistonning roli bevosita muzokaralardan ko‘ra vositachilik — ikki tomon o‘rtasida xabar almashishni ta’minlashga ko‘chgan. Islomobod rasmiylari kelishuvga erishish imkoniyati saqlanib qolayotganini bildirayotgan bo‘lsa-da, tomonlar pozitsiyasidagi keskin farqlar jarayonni murakkablashtirmoqda.

 

Pokiston rasmiylari urush nafaqat mintaqaviy xavfsizlik, balki global iqtisodiyot va millionlab insonlar turmushiga ham jiddiy ta’sir ko‘rsatayotganini qayd etmoqda. Xususan, mamlakatning energiya importi xarajatlari keskin oshgan.

 

Diplomatik manbalarga ko‘ra, asosiy tortishuv nuqtalari Eronning yadro dasturi bilan bog‘liq. AQSH Tehrondan yadro quroli ishlab chiqmaslik bo‘yicha qat’iy majburiyat talab qilmoqda, Eron esa sanksiyalarni yumshatish evaziga cheklovlarni muhokama qilishga tayyor.

 

Muzokaralar taqdiri ko‘p jihatdan tomonlar Hormuz bo‘g‘ozidagi vaziyat va yadro masalasi bo‘yicha murosaga erisha olishiga bog‘liq bo‘lib qolmoqda. Hozircha esa har ikki tomon o‘z pozitsiyasini keskin saqlab qolmoqda.