Namanganda 2 kishi qalbaki dollar sotayotganda ushlandi
Ular qalbaki 10 ming dollarni haqiqiy 7,5 ming dollarga sotmoqchi bo‘lgan.
Namangan viloyatida qalbaki valyuta savdosi bilan bog‘liq jinoyat fosh etildi. Bu haqda Zamon.uz’ga DXX xabar qildi.
Ma’lum qilinishicha, Chust tumanida mas’ul xodimlar tomonidan o‘tkazilgan tezkor tadbirda ikki nafar fuqaro — 1984-yilda tug‘ilgan va Yangi Namangan tumanida yashovchi shaxs hamda 1980-yilda tug‘ilgan, muqaddam sudlangan, Chust tumanida istiqomat qiluvchi shaxs o‘zaro til biriktirib jinoiy faoliyat olib borgani aniqlangan.
Ular xorijdan olib kirilgan 10 ming AQSH dollari miqdoridagi qalbaki pulni shartli xaridorga haqiqiy 7,5 ming AQSh dollariga sotishga uringan vaqtda qo‘lga olingan.
Holat yuzasidan jinoyat ishi qo‘zg‘atilgan bo‘lib, ayni paytda tergov harakatlari olib borilmoqda.
