Nobel tinchlik mukofoti sovrindori Nargis Mohammadi Eron qamoqxonasidan shifoxonaga yotqizildi

 

Eronning Zanjon shahridagi qamoqxonada jazoni o‘tayotgan Nobel tinchlik mukofoti sovrindori, inson huquqlari faoli Nargis Mohammadi sog‘lig‘ining keskin yomonlashishi tufayli shoshilinch ravishda kasalxonaga yotqizildi. Bu haqda uning oilasi tomonidan tashkil etilgan Nargis Mohammadi jamg‘armasi ma’lum qildi.

 

Ma’lumotlarga ko‘ra, 54 yoshli huquq himoyachisi bir necha bor hushidan ketish holatlarini boshdan kechirgan, shuningdek, yurak faoliyatida jiddiy buzilishlar qayd etilgan. Qamoqxona shifokorlari uning holatini muassasa sharoitida davolash imkoni yo‘qligini bildirganidan so‘ng, u mahalliy shifoxonaga o‘tkazilgan.

 

Tashkilot bayonotida ta’kidlanishicha, Mohammadi 140 kundan ortiq vaqt davomida zarur ixtisoslashtirilgan tibbiy yordamdan mahrum bo‘lgan. Uning oilasi esa uni Tehrondagi ixtisoslashgan shifoxonaga ko‘chirishni talab qilmoqda.

 

Shifokorlar dastlab uning qon bosimi keskin oshgani, vena ichiga dori yuborish va qo‘shimcha muolajalar talab etilgani haqida ma’lum qilgan. Biroq uning ahvoli yomonlashgani sababli keyinchalik favqulodda kasalxonaga yotqizish qarori qabul qilingan.

 

Hozirda Nargis Mohammadi reanimatsiya bo‘limida davolanmoqda, uning holati shifokorlar nazoratida qolmoqda.

 

Mohammadi avvalroq bir necha bor qamoq jazosiga hukm qilingan bo‘lib, u inson huquqlari, xususan, Eron qamoqxonalaridagi sharoitlar va ayollar huquqlarini himoya qilish bo‘yicha faoliyati bilan tanilgan.