Prezident Shavkat Mirziyoyev Samarqandda Osiyo taraqqiyot bankining yirik forumida ishtirok etadi

 

Oʻzbekiston Prezidenti Shavkat Mirziyoyev 3–4-may kunlari Samarqand shahrida boʻlib oʻtadigan Osiyo taraqqiyot banki Boshqaruvchilar kengashining 59-yillik yigʻilishi tadbirlarida ishtirok etadi.

 

Davlat rahbari forumning ochilish marosimida nutq soʻzlaydi hamda yigʻilish doirasida ishtirokchi xorijiy delegatsiyalar rahbarlari bilan ikki tomonlama uchrashuvlar oʻtkazadi.

 

Mazkur xalqaro tadbirning asosiy mavzusi “Taraqqiyot chorrahalari: mintaqaning oʻzaro bogʻliq kelajagini ilgari surish” boʻlib, u global va mintaqaviy iqtisodiyotning ustuvor yoʻnalishlarini muhokama qilish uchun muhim platforma vazifasini bajaradi.

 

Yigʻilishda “yashil” transformatsiya, energetik oʻtish, raqamlashtirish, investitsiyalarni jalb etish, oziq-ovqat xavfsizligi hamda yetkazib berish zanjirlarining barqarorligini taʼminlash kabi dolzarb masalalar muhokama qilinadi.

 

Tadbirda 100 dan ortiq mamlakat delegatsiyalari, xalqaro moliyaviy institutlar — Osiyo taraqqiyot banki, Jahon banki, Xalqaro valyuta jamgʻarmasi, Osiyo infratuzilmaviy investitsiyalar banki vakillari hamda xorijiy hukumatlarning 2 ming nafarga yaqin vakillari, shuningdek, yirik kompaniyalar, banklar va ekspertlar ishtirok etishi kutilmoqda. Jami 4 mingdan ortiq delegat qatnashishi kutilmoqda.

 

Oʻzbekiston 1995-yildan buyon Osiyo taraqqiyot bankining aʼzosi boʻlib, uning yirik hamkorlaridan biri hisoblanadi. Mamlakat tomonidan amalga oshirilayotgan loyihalar portfeli hajmi qariyb 16 milliard dollarni tashkil etadi. Oʻzbekiston ushbu nufuzli tadbirga ikkinchi bor mezbonlik qilmoqda.