Samarqandda faxriy jurnalist bilan uchrashuv o‘tkazildi
Muayyana Xo‘jayeva bir qator OAVlarda ishlagan bo‘lib, Kuba universitetida ham faoliyat yuritgan.
9-may — Xotira va qadrlash kuni arafasida Samarqand shahrida O‘zbekiston Jurnalistlar uyushmasi raisi vazifasini bajaruvchi Shuhrat Oripov hamda Uyushmaning viloyat bo‘limi rahbari Akram Haydarov O‘zbekistonda xizmat ko‘rsatgan jurnalist Muayyana Xo‘jayeva xonadonida bo‘ldi.
Tashrif davomida ustoz jurnalist bilan samimiy suhbat tashkil etilib, uning uzoq yillik ijodiy faoliyati va hayot yo‘li haqida fikr almashildi.
Ma’lumot o‘rnida, Muayyana Xo‘jayeva o‘z mehnat faoliyatini 1963-yilda viloyat radiosida boshlagan. Keyinchalik u “Ovozi tojik” gazetasi hamda O‘zbekiston teleradiokompaniyasida faoliyat yuritgan.
Shuningdek, ispan, ingliz va arab tillarida erkin muloqot qila olishi bilan ajralib turadi. 1970–1972-yillarda Kuba universitetida ham faoliyat olib borgan.
Uning boy tajribasi va ijodiy merosi bugungi yosh jurnalistlar uchun muhim ibrat maktabi ekani ta’kidlandi.
Muloqot davomida o‘zbek jurnalistikasi rivojiga ulkan hissa qo‘shgan marhum jurnalistlar xotirasi yod etildi.
Shuningdek, sohaning yangi avlodini tarbiyalashda faxriy jurnalistlar tajribasidan samarali foydalanish zarurligi qayd etildi.
