Toshkentda profilaktika inspektori 10 ming dollar pora bilan ushlandi
U MCHJ egasidan boshqa bir shaxsga qarshi jinoyat ishi qo‘zg‘atish va uni javobgarlikka tortish evaziga pul talab qilgan.
Toshkent shahrida profilaktika inspektori ishtirokidagi noqonuniy holat fosh etildi. Bu haqda Zamon.uz'ga DXX xabar berdi.
Ma’lum qilinishicha, Uchtepa tumani IIO FMB Huquqbuzarliklar profilaktikasi bo‘limi profilaktika katta inspektori 1995 yilda tug‘ilgan fuqarodan noqonuniy ravishda 10 ming AQSH dollari olgan vaqtida ashyoviy dalillar bilan ushlandi.
Ma’lumotlarga ko‘ra, inspektor 2025-yilning dekabr oyida mazkur fuqaroga tegishli MCHJ hujjatlarini soxtalashtirish orqali IT-xizmati ko‘rsatish evaziga firibgarlik yo‘li bilan chet el fuqarosidan 450 ming AQSH dollari olgan 1990 yilda tug‘ilgan shaxsga nisbatan jinoyat ishi qo‘zg‘atish va uni javobgarlikka tortishni va’da berib, ushbu pul mablag‘ini talab qilgan.
Tergovga qadar tekshiruv davomida joriy yilning fevral oyida ichki ishlar organlari tomonidan MCHJ bilan bog‘liq firibgarlik holati bo‘yicha jinoyat ishi qo‘zg‘atishni rad etish to‘g‘risida qaror qabul qilingani aniqlangan.
Hozirda katta inspektorga nisbatan jinoyat ishi qo‘zg‘atilib, tergov harakatlari olib borilmoqda.
