Eron AQShga 14 banddan iborat tinchlik rejasini taqdim etdi
AQSh reja bilan tanishib chiqishini, biroq uni maqbul deb hisoblamasligini qayd etgan.
Eron rasmiylari AQShga mojaroni tugatishga qaratilgan 14 banddan iborat tinchlik rejasini yubordi. Bu haqda mamlakatning Fars va Tasnim axborot agentliklari xabar berdi.
Ma’lum qilinishicha, hujjat Tehron va Vashington o‘rtasida davom etayotgan muzokaralar doirasida ishlab chiqilgan bo‘lib, AQShning avval taqdim etgan 9 bandlik taklifiga javob sifatida shakllantirilgan. Rejada mojaroni tugatish bo‘yicha asosiy shartlar va kelishuvga erishish yo‘l xaritasi aks etgan.
Eron tomoni ikki oylik sulh taklifini qo‘llab-quvvatlamasligini bildirib, asosiy masalalarni 30 kun ichida hal qilish va vaqtinchalik sulh o‘rniga to‘liq urushni yakunlash zarurligini ta’kidlagan.
Hujjatda bir qator talablar ilgari surilgan. Xususan, AQShdan harbiy harakatlarni to‘xtatish, tajovuz qilmaslik bo‘yicha kafolatlar berish, Amerika qo‘shinlarini mintaqadagi qo‘shni hududlardan olib chiqish, dengiz blokadasini bekor qilish, Eronning muzlatilgan aktivlarini ozod qilish hamda sanksiyalarni bekor qilish so‘ralgan. Shuningdek, yetkazilgan zarar uchun kompensatsiya to‘lash va mintaqadagi, jumladan Livandagi harbiy harakatlarni to‘xtatish talabi ham ilgari surilgan.
Bundan tashqari, Hormuz bo‘g‘ozidagi vaziyatni barqarorlashtirish bo‘yicha alohida mexanizmlar taklif etilgan.
Qayd etilishicha, mazkur hujjat Eron ichki idoralarida barcha zarur tasdiqlash jarayonlaridan o‘tkazilgach, vositachi tomon orqali AQShga yetkazilgan.
Hozirda Tehron rasmiylari Vashingtonning rasmiy javobini kutmoqda.
Donald Tramp esa Eron tomonidan ilgari surilgan shartlar qabul qilinishi ehtimoli pastligini bildirib, AQSh reja bilan tanishib chiqishini, biroq uni maqbul deb hisoblamasligini qayd etgan.
