Daromadi o‘rtachadan yuqori davlatlar qatoriga kirishni maqsad qilganmiz — Shavkat Mirziyoyev
O‘zbekistonda 2030-yilga qadar iqtisodiyot hajmini 240 milliard dollardan oshirish rejalashtirilmoqda.
Global beqarorlik sharoitiga qaramasdan, O‘zbekiston iqtisodiyoti 2026-yilning birinchi choragi yakunlariga ko‘ra 8,7 foizlik o‘sishga erishdi. Bu haqda Prezident matbuot xizmati yozmoqda.
Prezident Shavkat Mirziyoyevning ta’kidlashicha, amalga oshirilayotgan islohotlarda aholining turmush darajasini oshirish ustuvor yo‘nalish sifatida belgilangan. So‘nggi yillarda 8,5 million ehtiyojmand aholining daromadlari oshirilib, kambag‘allik darajasi taxminan 35 foizdan 5,8 foizgacha qisqartirilgan.
Qayd etilishicha, O‘zbekiston so‘nggi o‘n yilda Barqaror rivojlanish maqsadlariga erishishda eng katta ijobiy o‘zgarishlarga erishgan beshta davlat qatoriga kirgan.
Shuningdek, 2030-yilga qadar barcha sohalarni texnologik va innovatsion o‘sish modeliga o‘tkazish orqali iqtisodiyot hajmini 240 milliard dollardan oshirish rejalashtirilmoqda. Bu orqali mamlakatni daromadi o‘rtachadan yuqori davlatlar qatoriga qo‘shish va kambag‘allikka to‘liq barham berish maqsad qilingan.
“Natijada daromadi o‘rtachadan yuqori davlatlar qatoriga kirishni hamda kambag‘allikka to‘liq barham berishni maqsad qilganmiz”, — dedi Prezident.
Davlat rahbari, shuningdek, yaqin kunlarda 13 ta yirik strategik korxona aktivlarini o‘z ichiga olgan “Milliy investitsiya jamg‘armasi”ning 30 foiz ulushi xalqaro fond bozoriga chiqarilishini ma’lum qildi.
Uning so‘zlariga ko‘ra, mazkur qadam mamlakatning investitsiya muhitiga bo‘lgan ishonchni yanada mustahkamlashga xizmat qiladi.
