Nukusda sobiq boshlig‘ini shantaj qilib, 200 ming dollar olmoqchi bo‘lgan xodim ushlandi
U avval o‘zi ishlagan jamiyatning obro‘sini tushiruvchi ma’lumotlar borligini aytib, ularni tarqatmaslik evaziga fuqarodan pul talab qilgan.
Qoraqalpog‘istonning Nukus shahrida tovlamachilik yo‘li bilan sobiq rahbaridan 200 ming AQSH dollari talab qilgan shaxs qo‘lga olindi. Bu haqda Ichki ishlar vazirligi xabar berdi.
Ma’lum qilinishicha, 1980-yilda tug‘ilgan chet el fuqarosi Qoraqalpog‘iston Ichki ishlar vazirligiga ariza bilan murojaat qilgan. Arizada o‘zi rahbarlik qilayotgan jamiyatning Nukus shahridagi filialida o‘tgan yilning noyabr oyidan 2026-yilning fevral oyigacha operator sifatida ishlagan S ismli shaxsning unga internet orqali xat yozib, ushbu jamiyatning obro‘sini tushiruvchi ma’lumotlar borligini aytib, qo‘rqitayotganini bildirgan.
Har xil gaplar bilan bosim o‘tkazgan mazkur S ismli Nukus shahrida istiqomat qiluvchi fuqaro 200 ming dollar bermasa, ushbu ma’lumotlarni ommaviy axborot vositalariga tarqatib yuborishini aytgan.
Mazkur fuqaro muqaddam Jinoyat kodeksining tegishli moddalari bilan sudlangan. Amalga oshirilgan tezkor-qidiruv tadbiri davomida S ismli fuqaro Nukus shahridagi mehmonxonalardan birida ariza egasidan 200 ming dollarni olgan vaqtida tadbir ishtirokchilari tomonidan ashyoviy dalillar bilan ushlangan.
Mazkur holat yuzasidan Jinoyat kodeksining 165-moddasi (tovlamachilik) bilan jinoyat ishi qo‘zg‘atilgan.
