Pokistonda 21 yil noqonuniy yashagan ayol O‘zbekistonga qaytarildi

Pokiston hududida uzoq yillar davomida noqonuniy yashab kelgan O‘zbekiston fuqarosi diplomatlar ko‘magida vatanga qaytarildi. Bu haqda "Dunyo" axborot agentligi xabar berdi.

 

Ma’lum qilinishicha, ayol joriy yil fevral oyida O‘zbekistonga qaytishda yordam so‘rab elchixonaga murojaat qilgan. Suhbat davomida u 2005-yildan buyon Pokistonda vizasiz yashab kelayotgani va og‘ir ijtimoiy ahvolga tushib qolgani aniqlangan.

 

Ayolning so‘zlariga ko‘ra, u 2005-yilda Pokiston fuqarosi bilan turmush qurish maqsadida ushbu mamlakatga kelgan. Shu yilning o‘zida turmush o‘rtog‘i yo‘l-transport hodisasiga uchrab, nogiron bo‘lib qolgan. Shundan buyon u turmush o‘rtog‘ini parvarishlab kelgan. Hozirgi kunda erining salomatligi nisbatan yaxshilangan bo‘lsa-da, nogironlik holati qisman saqlanib qolgan. Oilaning ijtimoiy va moliyaviy ahvoli esa og‘irligicha qolmoqda.

 

O‘rganishlar natijasida fuqaroning moliyaviy imkoniyatlari cheklangani, u faqat kundalik ehtiyojlarni qoplash imkoniga ega ekani ma’lum bo‘lgan.

 

Shundan so‘ng elchixona tomonidan uning shaxsi va fuqaroligi tasdiqlanib, O‘zbekistonga qaytish uchun maxsus sertifikat rasmiylashtirildi. Pokiston Ichki ishlar vazirligi bilan olib borilgan muzokaralar natijasida 21 yil davomida vizasiz yashagani uchun belgilangan 8400 AQSH dollari miqdoridagi jarima bekor qilindi va mamlakatni tark etishga ruxsat berildi.

 

Shuningdek, diplomatik missiya ko‘magida fuqaro uchun aviachipta xarid qilinib, u 2-may kuni Uzbekistan Airways aviakompaniyasining “Islomobod–Toshkent” reysi orqali vatanga qaytarildi.