Qoraqalpog‘istonda kadastr bo‘limi rahbari pora bilan ushlandi
U o‘zboshimchalik bilan qurilgan va buzilishi belgilangan binoning kadastr hujjatlarini rasmiylashtirib bermoqchi bo‘lgan.
Qoraqalpog‘iston tumanlaridan birida faoliyat yuritgan Kadastr bo‘limi boshlig‘i pora bilan qo‘lga olindi. Bu haqda DXX xabar berdi.
Ma’lum qilinishicha, mazkur mansabdor shaxs 1987 yilda tug‘ilgan fuqaro tomonidan o‘zboshimchalik bilan egallab olingan 132 m² yer maydonida qurilgan, lekin fuqarolik ishlari bo‘yicha sudning 2024-yildagi hal qiluv qaroriga asosan majburan buzilishi belgilangan binoga nisbatan mulk huquqini e’tirof etish va uning kadastr hujjatlarini rasmiylashtirib berishni va’da qilgan.
U o‘z xizmat mavqeidan foydalanib, fuqarodan 2 ming AQSH dollari miqdorida pora olgan vaqtida Davlat xavfsizlik xizmati xodimlari tomonidan ashyoviy dalillar bilan ushlandi.
Hozirda kadastr rahbariga nisbatan jinoyat ishi qo‘zg‘atilib, tergov harakatlari olib borilmoqda.
