Avstriya josuslik gumoni bilan uch nafar rossiyalik diplomatni mamlakatdan chiqarib yubordi

Avstriya hukumati diplomatik binolar tomlarida joylashgan va josuslik maqsadida ishlatilishi ehtimoli bo‘lgan “antenna o‘rmoni” sababli uch nafar rossiyalik diplomatni persona non grata deb e’lon qildi. Bu haqda Reuters xabar berdi.

 

Ma’lum qilinishicha, Venada Rossiya davlatiga tegishli binolar, ayniqsa diplomatik xodimlar yashaydigan turar joy majmualarida o‘rnatilgan ko‘plab sputnik antennalari Avstriyaning asosiy ichki razvedka xizmati e’tiborini uzoq vaqtdan beri tortib kelgan. Mutasaddilar ushbu uskunalar boshqa davlatlarning sputnik aloqalarini kuzatish va tinglash uchun ishlatilishi mumkinligini istisno etmagan.

 

“Diplomatik immunitetdan josuslik qilish maqsadida foydalanish mutlaqo qabul qilib bo‘lmaydi”, — dedi tashqi ishlar vaziri Bit Maynl-Rayzinger bayonotida.

 

Uning ta’kidlashicha, mazkur uch diplomat allaqachon mamlakatni tark etgan.

 

Shu bilan 2020-yildan buyon Avstriya tomonidan mamlakatdan chiqarilgan rossiyalik diplomatlar soni 14 nafarga yetdi.

 

Avstriya davlat teleradiokompaniyasi ushbu uch shaxsni elchixona xodimlari sifatida ta’riflagan. Tashqi ishlar vazirligi bu ma’lumotni tasdiqlagan, ammo batafsil ma’lumot bermagan.

 

Venadagi Rossiya elchixonasi bu borada izoh berish so‘roviga darhol javob bermadi. Biroq Rossiyaning RIA Novosti axborot agentligi elchixonaga tayanib, Moskva bu qarorga nisbatan qat’iy javob qaytarishini ma’lum qildi.

 

Matbuot anjumanida ushbu uskunalar nima uchun xavf tug‘dirishi haqida so‘ralganda, Davlat xavfsizligi va razvedka boshqarmasi rahbari Silviya Mayer ularning hajmi va xususiyati bilan bog‘liqligini aytgan, ammo diplomatlarni chiqarish vaqti haqida izoh bermagan.

 

Vena xalqaro diplomatik markaz hisoblanib, u yerda Yevropada xavfsizlik va hamkorlik tashkiloti (YEXHT) hamda Birlashgan Millatlar Tashkilotiga qarashli muassasalar, jumladan, Xalqaro atom energiyasi agentligi joylashgan.

 

Rossiya va AQSH kabi yirik davlatlar odatda Avstriya, YEXHT va BMT tashkilotlari uchun alohida elchilar tayinlaydi va har biri o‘z diplomatik missiyasini boshqaradi.

 

Ikkinchi jahon urushidan keyin ittifoqchi davlatlar sektorlariga bo‘lingan Vena elchixonalar va xalqaro tashkilotlar ko‘pligi sabab uzoq vaqtdan buyon “josuslar shahri” sifatida ham tanilgan.