Eron BAAga raketa va dronlar bilan hujum qildi

Birlashgan Arab Amirliklari Eronni mamlakat hududiga raketa va dronlar orqali hujum uyushtirganlikda aybladi. Bu haqda Al Jazeera xabar berdi.

 

Rasmiylarga ko‘ra, zarbalar oqibatida Fujayra amirligidagi neft sanoati hududida yong‘in kelib chiqqan, uch nafar Hindiston fuqarosi jarohat olgan.

 

BAA Mudofaa vazirligi ma’lum qilishicha, havo hujumidan mudofaa tizimlari kun davomida Eron tomonidan uchirilgan 12 ta ballistik raketa, 3 ta qanotli raketa va 4 ta dronni tutib qolgan. Ayrim zarbalar natijasida Fujayra Neft sanoati zonasi hududida “katta yong‘in” yuzaga kelgan.

 

Mazkur hujumlar Eron va AQSh o‘rtasida 8-aprel kuni erishilgan sulhdan buyon BAAga qilingan ilk zarba sifatida baholanmoqda. Hodisa AQSh prezidenti Donald Tramp tomonidan Hormuz bo‘g‘ozida qolib ketgan tankerlarni kuzatib o‘tkazish tashabbusi ilgari surilgan fonida sodir bo‘ldi.

 

BAA Tashqi ishlar vazirligi hujumlarni “fuqarolik obyektlariga qaratilgan, asossiz va terrorchilik harakati” sifatida keskin qoralab, mamlakat o‘z xavfsizligi va suverenitetini himoya qilish uchun “qonuniy javob berish huquqini” saqlab qolishini bildirdi.

 

Tehron esa ayblovlarni rad etmoqda. Davlat teleradiokompaniyasi IRIB harbiy manbaga tayanib, Eronning neft obyektlariga zarba berish bo‘yicha oldindan rejalashtirilgan dasturi bo‘lmaganini ma’lum qilgan. 

 

Hujumlar fonida Hormuz bo‘g‘ozidagi vaziyat ham keskinlashdi. BAA rasmiylari Eron Abu-Dabi milliy neft kompaniyasiga qarashli tankerga dronlar orqali zarba berganini bildirgan. Abu Dabi Milliy neft kompaniyasi ma’lumotiga ko‘ra, hodisada jabrlanganlar yo‘q, kema yuklanmagan bo‘lgan.

 

Xalqaro hamjamiyat voqeani keskin qoraladi. Saudiya Arabistoni, Qatar, Quvayt va Bahrayn BAAni qo‘llab-quvvatlashini bildirdi. Kanada, Germaniya va Buyuk Britaniya Eronni keskinlikni oshirmaslikka chaqirdi. Yevropa Komissiyasi rahbari Ursula von der Lyayen zarbalarni “xalqaro huquq va suverenitetning ochiq buzilishi” deb baholadi.

 

Mutaxassislar fikricha, bu voqealar AQSh va Eron o‘rtasidagi muzokaralar boshi berk ko‘chaga kirib qolgan bir paytda mintaqadagi keskinlikni yanada kuchaytirishi mumkin.