Xitoyda pirotexnika zavodidagi portlash oqibatida kamida 21 kishi halok bo‘ldi

Xitoyning Hunan provinsiyasi, Liuyang shahridagi pirotexnika zavodida yuz bergan kuchli portlash oqibatida kamida 21 kishi halok bo‘ldi, 61 kishi turli darajada jarohat oldi. Bu haqda BBC xabar berdi.

 

Ma’lum qilinishicha, hodisa dushanba kuni Huasheng Fireworks zavodida sodir bo‘lgan. Portlashdan so‘ng qutqaruv xizmatlari zavod atrofidagi 3 kilometr radiusda joylashgan hududdan aholini zudlik bilan evakuatsiya qilgan.

 

Qidiruv-qutqaruv ishlariga qariyb 500 nafar xodim jalb etilgan bo‘lib, binoda qolib ketganlarni aniqlash uchun robot texnologiyalaridan ham foydalanilgan. Rasmiylarga ko‘ra, zavod hududidagi ikki porox ombori qutqaruv jarayonida yuqori xavf manbai bo‘lib qolmoqda.

 

Huquqni muhofaza qiluvchi organlar portlash sabablarini o‘rganmoqda. Dastlabki ma’lumotlarga ko‘ra, pirotexnika korxonasi rahbariga nisbatan “nazorat choralari” qo‘llangan. Portlash kuchi yaqin atrofdagi turar joylarga ham zarar yetkazgan.

 

“Uylarimizdagi oynalar chilparchin bo‘ldi, alyuminiy romlar egildi, hatto zanglamas po‘lat eshiklar ham bukilib ketdi”, — degan fuqaro.

 

Xitoy raisi Si Jinpin hodisa yuzasidan barcha kuch va vositalarni safarbar etib, bedarak yo‘qolganlarni qidirish hamda jarohatlanganlarni qutqarish bo‘yicha topshiriq bergan. Shuningdek, u voqea sabablarini chuqur o‘rganish va aybdorlarni javobgarlikka tortish zarurligini ta’kidlagan.

 

Mahalliy aholining aytishicha, portlash oqibatida yo‘llarga tosh va chiqindilar sochilib ketgan, ayrim fuqarolar xavfsizlik nuqtayi nazaridan hududni tark etgan.

 

Liuyang shahri pirotexnika mahsulotlari ishlab chiqarish bo‘yicha yirik markazlardan biri hisoblanadi. Xitoyda bu kabi korxonalarda yuz beradigan portlashlar tez-tez uchrab turadi va ko‘pincha og‘ir oqibatlarga olib keladi. Joriy yil fevral oyida Hubey provinsiyasidagi pirotexnika do‘konida sodir bo‘lgan portlashda 12 kishi halok bo‘lgan.