AQSh 48 soat ichida Eronning kelishuv bo‘yicha javobini kutmoqda

 

Axios xabariga ko‘ra, AQSh va Eron o‘rtasida harbiy harakatlarni to‘xtatishga qaratilgan muhim kelishuvga erishish ehtimoli ortib bormoqda.

 

Manbalarga ko‘ra, tomonlar bir sahifali o‘zaro anglashuv memorandumini imzolashga yaqin. Mazkur hujjat urushni to‘xtatish va keyinchalik kengroq yadroviy muzokaralar uchun asos yaratishi kutilmoqda.

 

AQSh rasmiylari Eron tomonidan asosiy masalalar yuzasidan yaqin 48 soat ichida javob kutmoqda. Ta’kidlanishicha, hozircha yakuniy kelishuvga erishilmagan bo‘lsa-da, tomonlar harbiy harakatlar boshlanganidan buyon eng yaqin nuqtaga kelgan.

 

Ma’lumotlarga ko‘ra, memorandum 14 ta asosiy bandni o‘z ichiga oladi. Ular orasida:

• mintaqadagi harbiy harakatlarni to‘xtatish;
• Hormuz bo‘g‘ozini ochish bo‘yicha 30 kunlik muzokaralarni boshlash;
• Eron tomonidan uranni boyitishni vaqtincha to‘xtatish;
• yuqori darajada boyitilgan uranni mamlakatdan olib chiqish;
• yadroviy qurol ishlab chiqishdan voz kechish;
• AQSh tomonidan sanksiyalarni yumshatish va muzlatilgan mablag‘larni ozod qilish;
• xalqaro, jumladan BMT tekshiruvlariga ruxsat berish kabi masalalar mavjud.

 

Shuningdek, manbalarga ko‘ra, Donald Tramp tomonidan “Ozodlik loyihasi” doirasidagi operatsiyani vaqtincha to‘xtatish qarori ham muzokaralardagi ijobiy siljishlar bilan bog‘liq.

 

Muzokaralarda AQShning maxsus vakili Stiven Vitkoff hamda Jared Kushner ishtirok etayotgani, jarayon to‘g‘ridan-to‘g‘ri va vositachilar orqali olib borilayotgani qayd etilmoqda.